TURA: Re·baenggipa November-ni 13 tariko ong·atenggipa Gambegre by-election-na dingtang dingtang political dolrang aro candidate-rang campaign ka·chichatokengon, Trinamool Congress (TMC)-ba ia by-election-na bilaken campaign-rangko ka·na a·bachengaha.
TMC-na campaign ka·aniko TMC-ni dilgipa aro a·dokni gitcham Chief Minister Mukul Sangma dilenga aro batanggimin salrangonin ua Gambegre constituency-ni ning·o donggipa dingtang dingtang biaprangona re·ange campaign ka·angaha.
Gambegre constituency-o ua TMC-ni candidate Sadhiarani M Sangma-na campaign ka·angengon, BJP aro NPP-ni gisepo bakrimani donga aro una skangde a·dokni Chief Minister Conrad K Sangma, Selsella Assembly constituency-o changgnina kingking amako man·enba MLA election-o susana ka·dongjachim ine parakataha.
“Ua amako man·enba election-rangon susana ka·dongjahachim aro ua MLA ong·kujaon BJP-ni dilgiparangsa uko (Conrad) Chief Minister ong·ataha. Maini gimin uko Meghalaya a·dokni Chief Minister ong·ataha, maina ua BJP-ni mandean ong·a,” ine Mukul matnange aganaha.
Lok Sabha election-oba BJP aro NPP-ni bakrime kam ka·anirang parak ong·aha ineba Sangma aganaha.
“Lok Sabha election-o BJP aro NPP dolrang, gipin candidate-rangko chena gita ku·cholsan ong·e vote-rangko salna jotton ka·aha. Uamang BJP aro NPP dolo candidate saksasan ine manderangna aganaha aro unosa manderang, uamangni mes ine chanchienggipara perusachim ine ma·sina man·aha maina uno mesni ganding go·okako manderang nikna man·aha,” ine Mukul matnangaha.
NPP aro BJP-ni noksarang dingtang ong·genchimoba, uamangni miksonganirangde apsanan ong·a ineba TMC-ni dilgipa aganaha.
