TURA: Re·baenggipa November 13 tariko ong·atenggipa Gambegre by-election-na dingtang dingtang political dolrang aro candidate-rang campaign ka·chichatokengahaon Mongolbar attamo Congress dolba, Meghalaya Pradesh Congress Committee (MPCC)-ni president Vincent H Pala, Tura-ni MP Saleng A Sangma, MPCC-ni working president Deborah Marak, gitcham MLA SG Esmatur Mominin aro gipin dilgiparang baksa Congress candidate Jingjang M Marak-na, Gambegre constituency-ni ning·o donggipa Daren A·gal aro dingtang dingtang biaprango campaign ka·angtokaha.
Ia campaign ka·anio, Tura-ni MP Saleng Sangma, manderangna aganprakangengon, National People’s Party (NPP)-chi dilenggipa MDA sorkariko matnangatenba, ia sorkarini a·laksiani a·sel, Garo Hills-ni manderang maming namgnirang man·jaenga indiba NPP baksa bakrimenggipa manderangsan namgnirangko man·enga ine parakataha.
“Angni MLA ong·chengani somoio, Krismasrangna skang anga constituency-ni dingtang dingtang biaprangona wenangon, bang·a manderangan merong brena gita angoniko tangka paisa bi·rongachim. Indiba angni MLA ong·ani skanggipa term-on iandakgipa neng·nikaniko anga namatna man·aha aro manderangni nangchongmotgipa bosturangko sokate on·ahani gimin darangba Gambegre constituency-o merong brena tangka bi·giparang dongjaha. Indiba batanggimin bilsionin ia MDA sorkarini tangka paisarangko jakkalsretani a·sel manderang da·oba merong aro ma·manti nangchongmotgipa bosturangna dilna a·bachengtaiaha,” ine Saleng aganaha.
Bangladesh a·songoniko niam gri gue badingbaani a·sel maikai Garo Hills-o gue game ge·e cha·giparang neng·nikanirangko chagrongna nangahachim, iani bidingoba ua, NPP sorkariko matnange aganangaha.
“Skangode gue bag-prakko gong 6000 ka·e palna man·achim indiba da·ode gong 2000-3000-mangnasan palna man·aiengaha indide iana an·ching sorkariko matnangana agre sako matnanggen. Sorkarisa iandake niam gri guerangko badingna on·enga aro iandake niam man·gipa tangkarangchin uamang na·simangna ma·manti bosturangko suale on·skaenga,” ine Tura MP aganaha.
Ia sal somoirango a·doko drugs jakkalanirang batroroengahani giminba ua sorkariko matnangataha.
“Na·simang an·tangtangan dilgipako seokanio daito donggiparang ong·e name chanchiesa seokna nanga. Meghalaya a·dokko man·aoni baita bilsi ong·aha chanchie nibo. Indita bilsirangna Garo Hills maini gimin ja·manchakkuenga. Skangode Meghalaya a·dokko lekka pora on·anio nambatgipa ine mingsing minggamachim indiba da·alo namjabatgipa ine mingako man·skaengaha,” ine Saleng aganaha.
Iana skang, MPCC-ni president Vincent H Pala-ba jinmana aganprakangengon, Congress dolni cheaniko ra·doangkuna ine Congress candidate Jingjang Marak-na pu·onchina Gambegre constituency-ni manderangko didiangaha.
“Tura Lok Sabha seat-ko Saleng cheani ja·man Meghalaya a·dok gimikon Congress dolni balwa balna a·bachengtaiaha. NPP aro TMC dolrangoniba hajal hajal manderang Congress baksa bakrimeaha. Khasi Hills-ni Nongthymmai aro Jaintia Hills-oba TMC-ni chu·gimik membor-rang Congress-o napna siengaha. MP election-o na·simang Saleng-na 18,000 vote-rangko on·aha aro MLA-oba 11,000 vote-rangko on·aha. Saleng-ni donanggipa bil·chamko chingni candidate Jingjang Marak ra·angskakugen,” ine Pala aganaha.
