TURA: Wangala A·dam Chibragre-o salgittamna ong·atenggipa 100 Drums Wangala Festival ba dama bol 100-ko doke Wangala manianiko Bristibar salo a·bachengataha aro ia Wangala manianiko, dingtangmancha jatni kal·susaanirang aro Handloom & Handicrafts Exhibition-ko do·ga oanichi a·bachengataha.
Ia 100 Drums Wangala manianiko a·bachengatanio, West Garo Hills a·jani Deputy Commissioner Jagdish Chelani, mongsonggipa sokgipa ong·e bak ra·angaha aro ia Wangala maniani bak gita Wangala A·damo rikgipa Nokpante aro Nokmong ba Nok A·chikkoba nokdonggae on·angjolaha.
Handloom & Handicrafts Exhibition-koba Deputy Commissioner do·ga oe on·angaha aro iano Harding Theological College-ni Principal Dr Imnanungshi Imsong, GHADC-ni Deputy CEM Nikman Ch Marak, GHADC-ni Joint Secretary Peter R Marak, Hundred Drums Wangala Festival Committee (HDWFC)-ni chairman Ronald Rikman Ch Sangma aro gipinrangba dongpae bak ra·angtokaha.
Ia 100 Drums Wangala manianiko a·bachengatanio, West Garo Hills a·jani Deputy Commissioner, ia Wangala manianiko ong·atenganina Wangala Committee-ni membor-rangko mittelpilangenba, ia manianiara Garo Heritage Village-mangmangnasan ong·aigija jat gimiknan mongsonggipa maniani ong·a ine parakangaha.
A·chikrango a·gilsakna mesokna gita bang·en daka rikanirang donga ine janapatengon, jattangni daka rikanirangko tang·doatchina aro dingtang dingtang biapni manderangko Garo Hills-ona salbachina gita DC, A·chik sakantikon ku·pattiangaha.
Bilsi gimiko game ge·e man·gipa mi misina pattigipa ra·rongipa Misi Saljong-ko mittelpilani gita bilsiantian A·chikrang Wangala manianiko dakronga aro uandaken ia dama bol 100 doke Wangala manianiko batanggimin ru·uta bilsirangonin A·chikrang ku·cholsan ong·e manirongbaenga ine nikna man·a.
Ia 100 Drums Wangala manianiko a·bachengatani salo, Jakpong Pe·a, Rong·ma Chilsusaa, Rong·ma Gosusaa, Wa·pong Sika, An·ding Oka aro uandakgipa jatni dingtang dingtang kal·susaanirangkoba ong·atangaha.
Ua agreba ia Wangala maniani skanggipa salo, NEHU Tura Campus-ni OPATA aro ASA dolrangba dingtangmancha Wangale mesokangaha.
Ia Wangala manianiko ong·atani bak gita A·chikrangni bijak song·susaani aro budu salgrikanikoba ong·atangaha. Budu salgrikanio Rongkhon dol chegipa ong·aha aro All Garo Hills MeECL dol gnigipa biapko man·skaaha.
