SHILLONG: North Eastern Hill University (NEHU)-ni registrar aro deputy registrar-ko ra·galchina dabienggipani bidingo inquiry committee-ko songna gita bakan Executive Council-ni tom·aniko ong·atgen ine NEHU-ni Vice Chancellor Prof Prabha Shankar Shukla ku·rachakaniko on·angenba, NEHU Students Union (NEHUSU)-ni jingjengataniko dontonge tom·tomaniko ra·bapilchina didiataha.
Iani bidingo NEHUSU-ni president Sandy Sohtun-na seachi u·iatengon, inquiry committee-ko songna gita ua Executive Council-ni tom·aniko re·baenggipa November 11 tariko ong·atgen ine Prof Shukla, ku·rachakaniko on·ataha.
“Inquiry committee-ni report-o pangchakesa chinga nanga gita ja·kurangko de·anggen,” ine NEHU-ni VC parakataha.
Ia official-rangko ra·galchina chatro chatrirangni dabianio maiba a·selde dongna nanga ine janapatengon, “Iandakgipa neng·nikanirangko jako ra·na gita University-o adita niam retiring donga anga University-ni Vice Chancellor ong·e, ia niam retirangko rakkina nangao ga·aka,” ine Prof Shukla parakataha.
Shillong aro Tura campus-na Pro Vice Chancellor-ko songanio ua University-ni dongimin niamrango pangchake November-ni 30 tarikon nanga gita ja·kurangko de·anggen ineba NEHU-ni VC ku·rachakaniko on·ataha.
Iana skang, NEHUSU-ni dabianirangko bilakbatatna gita chatro chatrirang, VC, registrar aro deputy registrar-ni bimangrangko tarienba so·e galaha.
NEHU-ni Vice Chancellor Prof Prabha Shangkar Shukla-ko kam watchina aro university-ni registrar baksana gipin official-rangko ra·galchina gita NEHUSU dabiengachim ine nikna man·a.
 |
ReplyForward
|
