TURA: Re·baenggipa 2026 bilsio 100 Drums Wangala manianiko ong·atani bilsi 50 gapna siengahani gimin ia manianio, 1000 Drums Wangala ba dama bol 1000-ko doke Wangala manianiko ong·atna miksongenga ine Hundred Drums Wangala Festival Committee (HDWFC) parakataha.
HDWFC-ni chairman Ronald Rikman Sangma-ni kobor ra·timgiparangna parakatani gitade, bilsignini gisepon ia 100 Drums Wangala maniani bilsi 50 gapna siengahani gimin ia golden jubilee-ko uamang committee-ni gita dal·bate manina chanchisamsoenga aro iana da·onin uamang kamrangko a·bachengengaha.
“Ia bilsi an·ching chang 48-gipa 100 Drums Wangala-ko manienga aro bilsignini gisepon ia maniani bilsi 50 gapna siengahani gimin chinga golden jubilee-ko maniani somoio dama bol 1000-ko doke Wangala manianiko ong·atna chanchisamsoenga,” ine Sangma aganaha.
A·chikrangni daka rikanirangko ripingna aro gital chasongni manderangna mesoke on·na gita ia Wangala A·dam Chibragre aro Garo Heritage Village-o Nokpante, Nokmong ba Nok A·chik aro Exhibition Centre-ko nokdonggaaha ineba HDWFC-ni chairman parakataha.
“Exhbition Centre-ko kuliani miksonganide artist ba jakni kamrangko changgipa sapgipa manderangna platform-ko ba cholko on·na miksonganian ong·enga aro Nokpante, Nokmong ba Nok A·chikko ia biapo rikaniara, mikkangchi an·chingni A·chik chadamberangna jatni daka rikanirangko ma·sie ra·na aro gualjana gita miksonge rikanian ong·a,” ine Sangma aganaha.
Golden jubilee-ko manianio 1000 Drums Wangala-ko ong·atna miksongenga ine janapatengon, iana ia biapko dal·batatna nanggen aro iana uamang kamrangko a·bachengna miksonganirang donga ine HDWFC-ni chairman parakataha.
