TURA: Bilsianti Baljek Airport-o ong·atenggipa Me·gong Festival-ko dongimin niamrang gita ong·atjaenga ine Jengjal jolo donggipa dingtang dingtang dolrang, chong·motan GSU, AAYF, FKJGP, ADE aro GSMC dolrang matnangataha.
Ia changba Me·gong Festival-ko re·baenggipa November 29 aro 30 tarikrango ia apsan biapon ong·atna manchisomanahachim aro ia chang Me·gong Festival-ona a·gilsak gimik mingsinggipa Rock band ‘Europe’-ko rimbana tik ka·manahachim.
Indake ong·engon, ia Me·gong Festival-na dongimin dingtang dingtang niam aro miksonganirang dongachim indiba ia niam aro miksonganirangko organiser-rang ja·rikjaenga ine dolbonga NGO-rang matnangataha.
Ia NGO-rangni parakatani gitade, jatni daka rikaniko tange rakkina, jatni man·rikanirangko ra·dona, Garo Hills-o tourism aro economy-ko tang·doatna, jatni ma·manti kamrang, jatni doka dam·ani, chrokani aro uandake joltangni manderangna namgni ong·na gitasa miksonge ia Me·gong Festival-ko ong·atengachim indiba batanggimin bilsigittamna ia manianiko ong·atanio, ia manianiko organize ka·enggipa dolrang, ia niam aro miksonganirangko 20 percent-ni gitaba ja·rikjaenga aro iani a·selan joltangni manderangna maming man·dapani gri, gong krorni kror tangkarang indin koros ong·na nangenga.
“Joltangni manderangna maming namgniko on·jaengani gimin aro ia manianio joltangni manderangkon bak ong·atjaengani gimin chinga namen suk ong·ja. Ia changoba uamang chingni dabianirangko chu·sokatja ong·ode ia brigipa Me·gong Festival-ko Jengjal (Baljek) Airport-o ong·atna on·jawa,” ine NGO-rang mikrakataniko on·angaha.
Ia Me·gong Festival-ko ong·atanio, gari gorarangko maming neng·nikani gri watna man·na gita traffic-ko tarisochina, jolni kri garirangko donchakna biapko tarichina, festival-ko ong·atna skang organiser-rang baksa tom·e nanga gita ja·kurangko de·samsochina, airport ning·o dokkan dakenggipa joltangni manderangna damko komie ra·china, joltangni volunteer-rangko rakkichina, nokmarangna, dingtang dingtang dolrangna aro jolni committee-rangna dingtang parking-ko donchina gitaba NGO-rang, District Administration-ko didiataha.
Git ring·gipa manderangko aro dolrangko seokanio, gipin a·songrangoni re·baenggipa dolrang baksana Garo Hills-ni mingsinggipa Lucas Marak, Riprap, Rough Road, Sunday Star, Ke Ke, Rester Brown aro uandakgipa joltangni manderangna chol on·china gitaba NGO-rang dabiangaha.
Ia Me·gong Festival-ko ong·atanio jatni kal·susaanirangko ong·atchina gitaba Jengjal-ni dolbonga NGO-rang dabiangaha.
