SHILLONG: Meghalaya a·doko dal·dalgipa project-rangko ra·bana aro tarina a·dok sorkari ku·rachakanirangko on·ahaoba bang·bata project-rangan be·en pil·chipgija donganiko nikna man·enga.
A·dok sorkarini ku·rachakanirangko niatgenchimode, a·dokni skotong Shillong songjinmao Sky walk, electric bus, smart road aro uandakgipa dingtang dingtang project-rangko tarina ku·rachakahachim indiba da·alona kingkingan iandakgipa project-rangni chu·sokgipa ong·aniko nikna man·kujaenga.
Barik-oni Police Bazar-ona skywalk-ko tarina ku·rachakaniko on·angaoni jasani ja·man, ia biapo skywalk-ko tarigenchimode traffic-na nangchakeaniko ra·bagen ine a·dokni Chief Minister, pa·sikani kattarangko aganskaaha.
Smart road project-ko niatgenchimoba, ia project-na baditaba tangkarangko koros ka·ani ja·man ia project-ko chu·sokatna man·jawa ine sorkari den·galpilaha.
Shillong songjinmaona electric bus garirangko ra·bana gitaba sorkari bilsignimangna skangan parakatahachim indiba kobor man·soani gitade, ia bus garirangna sorkari, jagittammangna skangsan order ka·atahani gimin badita somoirangko nangkugen darangba aganna man·kujaenga.
Integrated Command & Control Centre (ICCC)-ni somoikoba sorkari ra·dodaproroen basako ia project-ko a·bachengna am·enga darangba aganna man·kujaenga. Shillong songjinmao camera aro LED board-rangko chatahaoba New Shillong Township (NST)-oni jako ra·na sienggipa ICCC-ko da·onan a·bachengna man·skakujaenga.
Shillong Ropeway project-naba ia bilsini a·bachengabarachisan a·songni President, pangchakaniko songe on·angahachim indiba kobor man·soani gitade, kamrangko da·o November ja bijangchionisa a·bachengna sienga.
