VC baksa agangrikna okamaniko NEHUSU jegala
SHILLONG: North Eastern Hill University (NEHU)-o so·sojengjeng ong·anirangchi university-ko chalaianio neng·nikanirangko chagrongna nangengon, chatro chatrirangni nangnikanirangko namatna gita uamang baksa agangrikna nangnikenga ine NEHU-ni Vice Chancellor Prof Prabha Shankar Shukla, Sonibar salo parakataha.
“Chatro chatrirangni dabiani aro nangnikanirangko nama bewalo aro parak ong·e anga namatna nangnikenga aro iani gimin anga uamangko agangrikaniona re·bachina nangnikenga,” ine Prof Shukla aganaha.
Prof Shukla-ni aganani gitade, ua chatro chatrirang baksa agangrikna jotton ka·engoba nokon dongna nangengani gimin aro campus-ona name re·angna man·jaengani gimin agangrikna chol ong·kujaengachim.
Iani bidingo NEHU-ni VC, Executive Council (EC)-ni tom·anikoba adita salrangna skangan ong·atna tik ka·ahachim indiba chatro chatrirangni jingjengatanirangko dakenganichi tom·aniko ong·atna man·kujaengachim.
EC-ni tom·aniko Sombar salo ong·atna on·china chatro chatrirangko didiatengon, EC-ni tom·aniko ong·atna man·genchimosa ua campus damgnina Pro-Vice Chancellor-rangko songna registrar aro deputy registrar-ko songani bidingo inquiry-ko a·bachengatna man·gen ine NEHU-ni Vice Chancellor parakataha.
NEHU-ni namgninan ua an·tangko on·kange kam ka·enga ine janapatskaengon, skill development, entrepreneurship aro dingtang dingtang cholrangchi ua NEHU-ni gadangko ra·dona kam ka·enga ine Prof Shukla parakataha.
Indake ong·engon, NEHU-ni VC Prof Shulka kam watjaskal, uamang unbaksa agangrikna okamaniko ra·chakjawa ine NEHU Students Union (NEHUSU) parakatskaaha.
“Chingni okumu chake jingjengataniko a·bachengaoni da·o konta 90 batpilaha indiba da·onan ua chingni jingjengataniko dontonge agangriknasa ua press release-ko on·e dongkuenga. Chinga unbaksa agangrikna man·jawaha aro chingni jingjengataniko uni dontongchina mol·molaniara chingni jingjengataniko dontongna jotton ka·anisan ong·aia,” ine NEHUSU-ni general secretary Toniho Kharsati aganaha.
