TURA: North Eastern Hill University (NEHU)-ni Vice Chancellor Prof Prabha Shankar Shukla-ni kamo kusi ong·jae chatro chatrirang, okumu chake jingjengataniona sokpilengahaoba chatro chatrirangni dabianirangko knachakna gisiko nangjaenga ine Tura-ni social activist Cherian Momin parakatenba, NEHU-ni VC baksana registrar, deputy registrar aro niam gri kamo rakkia man·gipa official-rangko ta·raken ra·galchina didie, a·songni President Droupadi Murmu-na chitti sedoataha.
“NEHU-ni VC Prof Prabha Shankar Shukla, Registrar Colonel (Retd) Omkar Singh aro Deputy Registrar Amit Gupta, university-ni nanganirangko chu·sokatna man·jaha aro iani a·selan NEHU Students Union (NEHUSU) aro KSU NEHU Unit, okumu chake jingjengatna aro university-ko chipe donataona sokpilaha,” ine Momin, a·songni President-na sedoatgipa chittio janapatenba, university-ni aro chatro chatrirangni namgnina NEHU-ni VC baksana registrar aro deputy registrar-ko ra·galchina didiataha.
NEHU Tura campus-ni bidingo janapatskaengon, ia campus-ko nambate nirokna aro chalaina man·na gita Pro Vice Chancellor-ko songe on·na nangengani giminba Momin janapataha.
“University Grants Commission (UGC)-ni niamrango pangchake chalaigipa institute ong·e, ia university-ko chalaianio, chatro chatrirangni nanganirangko nirokanio, kam ka·giparangko nirokanio aro campus gimikni gitan name chalaina man·na nangachim indiba NEHU Tura Campus-o ia niamrangoni namen dingtanganiko nikna gita man·skaenga. Uni giminsa ia campus-ko UGC-ni dongimin niamrango pangchake chalaichina anga dingtangmancha sedoatenga,” ine Momin parakataha.
NEHU Tura campus-ko nirokenggipa official-ni bidingo janapatengon, university-ni campus-rangko nambate nirokna aro chalaina man·na gita Pro-Vice Chancellor (PVC) gita dakgipa official-rangkosa songchina UGC, recommend ka·ahachim ine Momin parakataha.
“NEHU Tura campus-ko chalaienggipa ‘campus director’-de PVC gita apsan bilo university-ko chalaina bil man·jani gimin neng·nikanirangko chagrongna nangenga. NEHU Tura campus-na PVC-ko on·piltaigenchimode, chu·gimik bil gnangbate aro nambate campus-ko chalaina man·gen,” ine Momin parakataha.
NEHU-o kam ka·enggipa manderangni chu·ongjaengani gimin aro man·gnirangko nangani kri on·china gita NEHU Non-Teaching Staff Association (NEHUNSA)-ni dabienggipani bidingo janapatskaengon, Supreme Court-ni ge·etgimin gita ‘Equal Pay for Equal Work’ ba ‘Apsan kamna apsan dormahako’-ko on·china Momin didiataha.
