WILLIAMNAGAR: Bristibar salo, India a·song gimikon a·songni skanggipa Prime Minister Pandit Jawaharlal Nehru-ni atchiani salko maniani bak gita Children’s Day ba Bi·sarangni Salko manitokengon, East Garo Hills a·jaoba ia salko dingtang dingtang skulrango maniangtokaha.
Williamnagar-ni Green Yard Higher Secondary School-o ia Children’s Day-ko maniani bak gita Annual Parents Meet aro Science Exhibition-ko ong·atangaha aro ia program-ko ong·atanio, East Garo Hills a·jani District School Education Officer (DSEO) Santimoy D Marak, mongsonggipa sokgipa ong·e bak ra·angaha.
Ia tom·anio ua mongsonggipa sokgipa ong·e jinmana aganprakangengon, skulo skigiparangoniko skie ra·na skangba chatro chatrirang, noktangtangon ma·a paarangoniko skie ra·chengronga ine bi·sarangna a·gilsakni seng·aniko on·anio skigiparang aro ma·a paarang pilakkon apsan daitoko ra·china didiangaha.
Williamnagar-ni Loyola School-oba ia Children’s Day ba Bi·sarangni Salko, dingtang dingtang program-rangko ong·ate maniangaha aro ia manianio skulo poraienggipa bi·sarangsan ong·aigija, skulo skigiparang aro kam ka·enggiparangba chrokani aro dakmesokanirango bak ra·e manderangko an·saoatangaha.
Loyola School-o ia Children’s Day-ko maniani bak gita, adita salrangna skang Dalu aro Kerala a·doko mikkarang jime waanganichi chirang banne duko ga·akenggipa manderangna an·tangtangni man·a gita tangka paisarangkoba on·gilangaha.
Williamnagar-o ia Children’s Day-ko National Award-ko man·gipa Gamchi Timre R Marak-ni Educere Higher Secondary School-oba maniangaha aro ia salo dingtangmancha skulni bilsi 30 gapanikoba maniangjolaha.
Educere Higher Secondary School-o Children’s Day-ko manianio East Garo Hills a·jani Deputy Commissioner Vibhor Aggarwal, mongsonggipa sokgipa ong·e jinmana aganprakengon, batanggimin bilsi 30-ni gisepo ia jolo donggipa bi·sarangna lekka porako on·anichi bang·a manderangkon dal·dalgipa manderang ong·atahani gimin skulko aro skulni principal Gamchi Timre R Marak-ko mittelpilangaha.
Ia program-ko ong·atanio Social Education Officer Dr Jilpash R Marak, Resubelpara DIET-ni Assistant Professor Dr Aldrin B Marak aro MBOSE-ni Deputy Director Balmuri K Marak-ba dongpae bak ra·angaha.