TURA: Re·anggipa November 13 tariko Namabila VEC-ni election-ko ong·ataniara ‘chu·onggijani aro ra·chakna man·gijani’ ong·aha ine ia election-o susaanggipa adita sak candidate-rang matnangatenba, ia election-ni result-ko den·galpile, job card holder-rangko name nipiltaichina aro election-ko ong·atpiltaichina dabiem Selsella Block-ni BDO-na sedoataha.
BDO-na sedoatgipa chittio, Rebecca Ch Marak, Jorina Bibi, Monjilla Begum aro job card holder Enamul Hoque minggipa soi ka·ahachim.
Selsella BDO-na ia manderangni badi ka·e sedoatani gitade, job card donggipa manderangoni mitamde siahani gimin, mitamde card kinggni dongani gimin, mitamde tol·e card tariani gimin aro mitamde dingtang biaprangona apjitangahani gimin election-na skang, ia pilakkon name nipiltaichina mol·moltokahaoba official-rang nipiltaianiko dakjahani gimin job card holder-rang, suk ong·gijaniko paraktokahachim.
VEC-ni secretary-na susaanio Rebecca Ch Marak-ko 28 vote-rangchisan amaiaha ine talataniko on·angengon, ia election-o niam gri pu·ongipa sak 31 manderangni vote-rangko den·galgenchimode Maraka-an 3 vote-rangchi seokako man·genchim ine badi ka·dogiparang, BDO-na sedoatgipa chittio parakataha.
Indake ong·engon, ia election-ni result-rango pangchake VEC-ni president aro secretary-ni kamrangko on·kujachina aro kakket ong·e election-ko ong·atpiltaichina gita ia candidate-rang aro job card holder-rang, Selsella BDO-ko didiataha.
