SHILLONG: North Eastern Hill University (NEHU)-o Vice Chancellor Prof Prabha Shankar Shukla-ko kam watchina dabian baksana Registrar aro Deputy Registrar-ko ra·galchina dabie chatro chatrirang jingjengatanirangko dakengon, NEHU-ni VC, Sukrobar sal dipet chutti ra·angskaaha.
An·tangni chutti ra·ani bidingo NEHU-ni Registrar-na seachi u·iatengon, ua November 17 tarikoni 29 tarikona Earned Leave (EL)-ko ra·angenga aro ua nangnikgenchimode chutti ra·aniko bakrodapatani cholrangba donga ine Prof Shukla parakataha.
Uni chutti ra·engmiting somoio, NEHU-ni dal·batsranggipa professor N Saha ba gipinrang kamrangko jako ra·soskagen ineba VC-ni Leave Application-o parakataha.
Re·anggipa Bristibar salosan, NEHU-o ong·enggipa obostarangni bidingo sakgni membor-rangchi sandirokna gita Education Ministry, committee-ko songe on·angahachim.
