TURA: North Eastern Hill University (NEHU)-ni Vice Chancellor Prof Prabha Shankar Shukla-ko kam watchina dabian baksana university-ni registrar aro deputy registrar-ko kamoniko ra·galchina dabie, Shillong aro Tura campus-rango chatro chatrirang jingjengatanirangko dakengon, NEHU-o ong·enggipa obostarangko namatna gita NEHU-ni VC Prof Shukla-ko kam watchina aro gital songa man·gipa VC-ni jakchi ia campus damgninan Pro Vice Chancellor (PVC)-rangko songe on·china NEHU Tura campus-ni chatro chatrirang, Tura-ni MP Saleng A Sangma-na sedoataha.
“Da·o ong·enggipa VC jako ra·chengaonin NEHU-ni gadang namen tang·onangaha aro ian university-o uni kam choligijaniko mesokani ong·a. University-ni iandake tang·onangani a·selan NEHU-ni mingnamanikoba nosto ka·aha aro lekka porako on·anio tang·onange, chatro chatrirangna nangchakeaniko ra·baaha,” ine NEHU Tura campus-ni chatro chatrirang, Tura MP-na sedoatgipa chittio parakataha.
Kamna qualify ong·gijagipa manderangko registrar aro deputy registrar-ni kamrango donataha ine VC-ko matnangatengon, ia official-rangko uamangni poraiani gadang aro u·i-ma·sianirangko nichenggija kamo donatani a·selan university-ko chalaianio chu·sokgijanirangko nikna man·aha ine Tura campus-ni chatro chatrirang parakataha.
NEHU Tura campus-ni bidingo janapatskaengon, ia campus-o dongpagipa garirangba namjaha, hostel-rangko name taridapanirang dongja, chirang chu·ongja aro research dakenggipa chatro chatrirangna dingtang hostel-rangba dongja ine chatro chatrirang, Tura MP-na badi ka·doangaha.
“NEHU Tura campus-o academic building-rangba be·na siengaha, skigiparangba chu·ongjaenga, History aro Archaeology department-o bosturang chu·ongjaenga, central library-o ki·taprangba chu·ongjani a·sel poraianirango neng·nikanirangko man·na nangenga. Iana agreba dingtang dingtang kamrangna advertisement-ko on·ani ja·manba non-teaching staff-rangko da·onan ra·chipkujaengani a·sel kamrangko ka·anio neng·nikanirangko chagrongna nangenga,” ine Tura campus-ni chatro chatrirang parakataha.
NEHU-ni VC Prof Shukla-ko kam watchina dabianio pilak chatro chatrirangan ku·cholsan ong·enga ine janapatengon, Shillong aro Tura campus damgninan PVC-rangko songe on·piltaichina chatro chatrirang, Tura-ni MP-ko didiataha.
NEHU Tura-ni campus-ni Post Graduate Students Union (PGSU)-ko VC-sa bon·ataha ine an·tangtangni suk ong·gijaniko parakatskaengon, chatro chatrirangni dingtang dingtang neng·nikanirangko chagrongna nangengmiting somoirango ku·rang on·dilna gita PGSU-ko songpiltaina on·china chatro chatrirang, Tura MP-ko didiataha.
