TURA: West Garo Hills a·jao mongsonggipa ramarangoni dilsa, chong·motan Chibinang-oni Bikonggre-ona dakanggipa ramako tarianirang namjaenga ine Chibinang jolni GSU, FAF aro ADIL dolrang, suk ong·gijaniko parakataha.
Ia dolgittam NGO-rangni parakatani gitade, Chibinang-oni Bikonggre-ona dakanggipa ramara, ia jolrango songdongenggipa manderangna mongsonggipa re·a doani chol gita ong·engachim indiba ia ramako tarianio, namgijagipa bosturangko jakkalengani a·sel ian mikkangchi ia rama aro ia ramao pangchakenggipa manderangna ka·dongani gri ong·aniko ra·baani gita ong·enga.
“Jolo songdongenggipa aro ramako re·ruraenggipa manderangni chingna u·iatani gitade, ia ramako tarianio namgijagipa bosturangkosa jakkalenga aro ian ia ramana kenchakna nangani ong·enga. Unbaksana ia ramako tariani bewalrangba niam gita ong·jaengani a·sel ian rama gita re·ruraenggipa manderangna kenchakna nanganiba ong·enga,” ine Chibinang-ni dolgittam NGO-rang parakataha.
Ia ramako tarianio chu·onga gita nalarang dongjani a·sel ian wachini somoirangona kenchakna nangani ong·enga ineba dolgittam NGO-rang parakataha.
“Ia ramao nalarangni chu·onggijaniko nikna man·engani gimin wachini somoirangode ia ramarango chirangni ditdoe dongako nikna man·aigen aro ian ramako ta·raken nosto ka·pilaigen,” ine GSU Chibinang regional unit-ni president Hamit Marak parakataha.
Manderangni namgnina sorkari, ia ramako tarina gita bang·bea tangka paisarangko chame on·ataha ine janapatengon, manderangna ku·rachakgimin gita ia ramako name tarie on·na nanga ine NGO-rang dabiangenba, ia rama tarianiko sandirokchina gita official-rangkoba didiataha.
