SHILLONG: RSS aro BJP dolrangni a·selsa North Eastern Hill University (NEHU)-o so·sojengjeng ong·anirangko nikna man·enga ine matnanganiko Sombar salo, a·dokni Cabinet Minister aro BJP-ni dilgipa AL Hek jegalatenba, da·o dipet NEHU-o ong·enggipa obostarangko sandirokengkua aro saksani aganaianichide iani chong·mot a·selko ma·sina man·jawa ine parakataha.
RSS aro BJP dolrang, an·tangtangni manderangko North Eastern Hill University (NEHU)-ko chalaina jotton ka·ahani a·selsa so·sojengjeng ong·anirang a·bachengaha ine adita salrangna skangsan a·dokni Congress dol matnangatahachim.
Ma·mongo BJP sorkariko rikani ja·man, RSS aro BJP baksa bak ong·gipa manderangko chalaina gita NEHU-ni official dake songahani a·selsa NEHU-o so·sojengjeng ong·na a·bachengaha ine Congress dolni dilgipa Ronnie V Lyngdoh aganahachim.
Iani bidingo kobor ra·timgipa manderang baksa agangrikengon, NEHU-o ong·enggipa obostarangni bidingo kakketko ma·sie ra·na gita ma·mong sorkari, dingtangmancha committee-ko Shillong-ona watataha ine Hek parakatskaaha.
“Saksani aganaianichide an·ching NEHU-o ong·enggipa obostarangni a·selko ma·sina man·jawa. Adita salrangna skang ia committee baksa tom·anioba mitam membor-rang apsan daken matnanganirangko dakaha,” ine ua aganaha.
Dingtang dingtang manderangoniko kobor ra·ani ja·mansa ma·mong sorkari, nanga gita ja·kurangko de·anggen ine janapatengon, NEHU-o ong·enggipa obostarangara da·o namjabatangengaha ine Hek, ku·chake aganaha.
Iana skang Sombar salo, BJP-ni dolsa dilgiparang NEHU-ona re·angenba, skigiparang aro chatro chatrirang baksa agangrikangaha.
