SHILLONG: North Eastern Hill University (NEHU)-ni Vice Chancellor (VC) Prof Prabha Shankar Shukla-ko kam watchina dabie chatro chatrirang okumu chake jingjengataniko dontongkujaengani gimin NEHU-ni Post Graduate (PG) aro Professional course porikkarangko somoi gita ong·atna man·janaba gnang.
NEHU-ni VC Prof Shukla-ko kam ra·galchina dabianiko chu·sokatkujaengani gimin NEHU Students Union (NEHUSU) aro KSU NEHU Unit, okumu chake jingjengataniko dontongkujana tik ka·ahachim.
Iani bidingo kobor ra·timgiparangna talataniko on·angengon, NEHU-o ong·enggipa obostarangko nie aro batanggimin antignina kingking class-rangkoba ra·na man·jahani gimin PG aro Professional course-ni porikkarangko December jao ong·atna man·jawaha aro porikkarangko re·baenggipa 2025 bilsini February jaona ra·doatskana tik ka·angaha ine NEHU-ni acting VC Prof Nirmalendu Saha parakataha.
Academic calendar-ko gital dake taripiltaina Academic Council-ni tom·aniko bakan ong·atgen ineba NEHU-ni VC in-charge parakataha.
“NEHU-ni acting VC ong·e jako ra·ani ja·man angni skanggipa daitoara chatro chatrirangni namgniko nianian ong·a. Okumu chakenggipa chatro chatrirangni an·seng baljokanina jajrengchake anga baditaba chang chatro chatrirang baksa agangrikaha aro uamangni okumu chake jingjengataniko dontongchina anga uamangko changni chang mol·molahachim. Chingni gisepo agangrike ma·sichakgrikanichi bakan chinga tom·tomaniko ra·bapilna man·gen ine ka·dongenga,” ine Prof Saha aganaha.
Okumu chake jingjengatenggipa chatro chatrirangko nirokenggipa doctor-rang aro medical dol baksaba ua agangrikjringenga ineba NEHU-ni acting VC parakataha.
Indake ong·engon, okumu chake jingjengatanichi chatro chatrirangni be·en bimangrang namroroangjaenga ine nikenba, NEHU-ni Chief Medical Officer Carol Mukhim-ba chatro chatrirangni okumu chakaniko dontongchina mol·molataha.
