TURA: Re·anggipa November 15 tariko Haripur VEC-ni election-ko ong·ataniara ‘chu·onggijani aro ra·chakna man·gijani’ ong·aha ine ia election-o susaanggipa adita sak candidate-rang matnangatenba, ia election-ni result-ko den·galpile, job card holder-rangko name nipiltaichina aro election-ko ong·atpiltaichina dabienba Selsella Block-ni BDO-na sedoataha.
Selsella BDO-na badi ka·e sedoatani gitade, job card donggipa manderangoni mitamde siahani gimin, mitamde card kinggni dongani gimin, mitamde tol·e card tariani gimin aro mitamde dingtang biaprangona apjitangahani gimin election-na skang, ia pilakkon name nipiltaichina gita November 4 tarikon, job card holder-rang sedoatahachim indiba official-rang nipiltaianiko dakjahani gimin November-ni 15 tariko ong·atgipa election-ara niamni a·palo ong·ahachim.
“Ia kamrangko matchotkujaengani gimin election-ko ong·atna ba pu·onna gita on·kujawa ine chanchiesa ia election-o amako man·gipa candidate-rang, an·tangtangna pu·onchina manderangona re·ange mol·molejahachim indiba job card holder-rangni mol·molaniko knachakgija Haripur election-ko ong·atahani a·selsa ia candidate-rang election-o amako man·na nangaha,” ine Haripur election-o susagipa Arjuma Begum aro gipin candidate-rang, Selsella BDO-na badi ka·doataha.
Indake ong·engon, ia election-ni result-rango pangchake VEC-ni president aro secretary-ni kamrangko on·kujachina aro kakket ong·e election-ko ong·atpiltaichina gita ia candidate-rang aro job card holder-rang, Selsella BDO-ko didiataha.