TURA: East Garo Hills a·jani Rongjeng Civil Sub-Division-o Animal Husbandry & Veterinary (AH & Vety) officer ong·e kamko ka·enggipa mandeni kosako Rongjeng-ni dingtang dingtang NGO-rang, East Garo Hills a·jani Deputy Commissioner-na badi ka·doangenba, ia officer-ko dingtang biapona ra·jitatchina dabiangtokaha.
Iani bidingo East Garo Hills a·jani Deputy Commissioner-na badi ka·e sedoatengon, Rongjeng-o AH & Vety officer ong·e kamko ka·enggipa mande, kamtango gisik nangja, veterinary-o kam ka·enggipa aro gipin manderangko kragija dake saironga, dakbewalrang namja, jolni manderangko mikchepronga aro ma·sianirang chu·ongja ine NGO-rang matnangatenba, ia officer-ko dingtang biapona apjitatchina didiataha.
Ia officer-ko ta·raken ra·galchina, uni biapo nambata officer-ko donskachina, ia officer-ni kosako rakgipa ja·kurangko de·china aro ia officer-ni kosako matnanganirangko inquiry dakchina gitaba Rongjeng-ni bakrimgimin NGO-rang, East Garo Hills a·jani Deputy Commissioner-ko didiataha.
