Museum-ko nie ra·anichi chatro chatrirangko skie ra·china CM didia
SHILLONG: Gittamgipa changna Shillong songjinmani U Soso Tham Auditorium-o ong·atenggipa Tri Hills Ensemble-ko Bristibar salo, a·dokni Chief Minister Conrad K Sangma do·ga oe on·angaha aro ia program-ko ong·atanio, a·dokni Arts & Culture Minister Paul Lyngdoh, Welsh Sorkarina India-ni Head Mitchell Theaker aro gipinrangba dongpae bak ra·angtokaha.
Ia Tri Hills Ensemble-o Meghalaya a·dokni dolgittam jatrang, chong·motan, Khasi, Jaintia aro Garorangni dingtang dingtang sika koanio, changa sapani aro daka rikanirangko mesokna bilsiantian ong·atrongenga aro ia chang ia Tri Hills Ensemble-o dingtangmancha Jan Jatiya Gaurav Diwas-koba apsan manijolenga.
Ia Tri Hills Ensemble-ko do·ga oe on·anganio a·dokni Chief Minister, jinmana aganprakangengon, ia maniara an·ching jatni daka rikani bewalko aro an·ching songsalni manderang baksa jinma melie manianian ong·a ine parakataha. Iako manianichi an·ching jatni daka rikani bewalko aro changa sapaniko mesokan baksana ripingna dakchakani ong·a ineba Chief Minister aganaha.
Jatni daka rikani bewalrangni gimin aganangengon, iara mingsa pagitcham ma·gitrangni dakbewal rikbewalrangko gimaatgija tangkame donna aro ia dingtangmanchagipa jatni bewalchin an·chingko jinmaoniko niksenggipa ong·atna gita aro darangkoba gisik saataniko on·gija aro neng·nikaniko on·gija mikkangchi janggi tanganio namgipa cholko ia indakgipa changa sapaniko jakkalna aro tang·dororoatna gita a·dokni Chief Minister agan-ku·pattianikoba on·angaha.
Iandakgipa program-rangara mikkangchi chadamberangna mikkim rasongko ra·baani aro jatni daka rikanirangko ripingangkuna chol ong·a ine janapatengon, jatni sika koanio, doka dam·ani aro pagitcham ma·gitchamrangni dakbewal rikbewalrangko ripingna kam ka·anio sorkari, dingtang dingtang program-rangkoba a·bachengataha ine Sangma aganaha.
“Uni gimin an·ching ia jatni dakbewal rikbewalko rakkina aro ianon rasong chana nanga,” ine ua aganaha.
Captain Williamson Sangma Museum-ko dingtangate taridapahani gimin Arts & Culture department-ko mittelpilangengon, a·dokni man·e cha·begipa man·rikani aro dingtang dingtang jatrangni bidingo skie ra·na gita skul aro college-rangko ia museum-ona re·bana gita niamko donchina ua Education department-ko didiangaha.