DAINADUBI: North Garo Hills aro Assam a·dokni sima jolo donggipa Manda chibimaoniko Damra-oni Dainadubi-ona kingking niam gri an·cheng bikotenga ine matnangenba Sukrobar salo, Mothers Union-ni dilanichi dingtang dingtang dolrang aro jolo songdongenggipa manderang, jinma re·jomaniko ong·atangaha.
Jinma re·jomaniko Bakrapur National Highway-oni a·bachengate Nokmakundi kal·chakramona ong·atangaha aro ia jegale re·jomanio, Assam aro Meghalaya a·dok damgnini dingtang dingtang A·chik dolrang aro jolo songdongenggipa manderangba bak ra·angtokaha.
Ia jinma re·jomaniko ong·atani bidingo Mothers Union-ni dilgiparang talataniko on·angengon, Damra-oni Dainadubi-ona kingking Manda chibimaoniko niam gri an·cheng bikotengani a·sel, samba jolrango songdongenggipa manderang neng·nikanirangko chagrongna nangtokenga ine parakataha.
Ia chibimaoniko niam gri an·cheng bikotengani a·sel, ia chibimani a·dramrang be·waktokengaha aro wachini somoirangode chirang dal·baon, ia jolrango songdongenggipa manderangna kenchakna nanganirang ong·enga ineba Mothers Union-ni dilgiparang parakataha.
Ia chibimaoniko niam gri an·chengrangko bikotangkua ong·ode mikkangchi chibima rikamrango donggipa manderangna kenchakna nangani ong·batgen ineba Mothers Union-ni dilgiparang, ia chibimaoniko niam gri an·cheng bikotaniko dontongchina dabiangtokaha.
