Tura: Mejaomangmang ong·atgipa MP election-o Tura MP Saleng Sangma, PA Sangma-ni nokdangoniko seat-ko ra·sekaha, ugitan Saleng Sangma-ni dilenggipa Congress-ba by-poll election-o uamangni seat-ko man·rikjaha, NPP man·e katskaha, ian ajak sotgrika gita ong·aijok.
Gambegre seat-ko Mehtab Chandee A Sangma, 4594 vote-ranchi man·aha. By-poll-0o 90.93 % manderang vote on·tokaha. Mehtab, chu·gimikde 12678 votes-ko man·aha. Sadhirani (TMC) -8084 votes, Jingjang Sangma, INC candidate – 7695 vote, BJP- 710 vote-ko man·aha. Sakgni independent candidate-rang- Jerry Sangma (706) aro Sengkrabirth Marak -147 votes-ko man·skaha. Sak 95 voter-rang NOTA-o sikdepaha.
Batanggimin chang 3 election-onin Gambegre constituency, Saleng Sangma-ni jakon ong·achim. Indiba uni MP election-o cheani ja·man Gambegre constituency bangbang ong·aha. Result-ko parakatna skang, mitamrangde ua seat-ko INC-san chetainaba donga ine aganachim. Saleng-ni raken jotton ka·omangba seat-ko NPP man·skaha. Meja bilsi 2023 election-o Congress ge 5 seat-rangko man·genchimoba da·ode Congress-ni saksamangmangsan MLA dongaijok.
TMC-ni Sadhiarani Sangma, changgittamna joljol by-poll-o sirikengjok, election changantian ua gnigipa ong·e sirikenga. Bilsi 2018 election-oba bilaken susahachim. Bilsi 2023-o, Saleng uni kosako cheaha.
By-poll cheani ja·man Mehtab, segipa Conrad Sangma baksa WGH-ni DC office-ona vote changipa biapona re·angaha. Uamang baksa NPP-ni dilgiparangba dongpae, Mehtab-na uni cheanina nama sikaniko on·aha.
Cheani ja·man koborna parakatengon Mehtab, Gambegre jolni manderangko uamangni dakchakanina mittelaha.
“Manderang development-na vote-ko on·aha, iako result-o talen nikna man·aha. Garo Hills aro Meghalaya a·dok, NPP-ni sorkario dingtangani somoirangko nikna man·enga aro mikkangchiba nikangkugen ine Mehtab agankuaha.
Indake ong·engon CM, Conrad, jikgipani election cheanina kusi ong·ako parakaha.
“Gambegre-ni manderangna jekon chinga ku·rachakaha, uarangko chu·sokatna kam ka·gen, ine janapate Conrad, party memborrang, dilgiparang aro jolni manderangko mittelaha.
