SHILLONG: New Shillong Township Water Supply Scheme gong kror 1600 tangkachi kamrangko ka·gen aro uno Supervisory Control aro Data Acquisition (SCADA) system donggen.
Ian computer system ong·a aro digital network chi watani system-ko nirokgen.
SCADA system gita technical-ni u·i-ma·siani uamango dongjae ua project-o a·doktangni contractor-rangko sorkari man·jaenga ine PHE Minister, Marcuise Marak mejalo kobor ra·timgiparangna aganaha.
Ia system-chi, dashboard-ni gita sorkari altuaen water supply project-ko nirokna man·gen aro system-o jeba gualanirangko ma·sina gita man·gen aro iako ta·raken taripilna man·gen jeon officer maiba gualaniko aro ja·mano taripilna badita salrangko nanggen uko sandiani donga.
New Shillong Township Water Supply Scheme-na kamko ka·aniko a·bachengatmangiminko aganao, sorkari gitalgipa technology-ni gita asamsoanirangko ra·gatna nangaha indake joltangni contractor-rangko ra·na neng·nikani dongaha ine Marak aganaha.
A·bachengao a·dokoni joltangni contractor-rang, uamangna project-ni dingtang gipin bakrangko sorkarini pakwatako nangnikaha.
Indake ong·engon, Greater Shillong Water Supply Scheme Phase III-na kam ka·ani mikkang bilsini March jao matchotgen aro da·o joltango aro tangka-paisani neng·nikani dongja jeon project-ko somai gita matchotna man·aba donga ine ua u·iataha.
Ia project-o sal somaini gimin aganao chini ja·pang Pipeline-rango neng·nikani ong·jana gita project-rango a·ran karini somaio sorkari mamingkoba dakna man·jawa uni gimin chiko name simsake jakkalchina minister manderangko aganaha.
Shillong-o pipe-rang gopreta gita bang·a neng·nikanirang donga aro Shillong Municipal Board-na chiko watna on·ani department-ni kam ong·a aro Board chiko sualgen, Minister aganaha.
Sorkari, maibakai system-ko ra·angna chanchienga aro uko kam ka·na amgen amjagen Cabinet uani gimin che·em che·em chanchigrikgen, ua aganaha.
