SHILLONG: Khasi Hills-ni a·jarango ba songrango A·chikrangko Nokma songaniko changsatai Khun Hynniewtrep National Awakening Movement (KHNAM) jegalangaha.
Indake Mylliem Syiemship-ni ning·o ga·akgipa dingtang dingtang biaprango niamgri A·chikrangko Nokma songenga inenba KHNAM-ni Working President, Ban Thomas Passah, Khasi Hills Autonomous District Council (KHADC)-ni Chief Executive Member (CEM), PN Syiem-na aganaha.
KHADC CEM PN Syiem-na seatgipa chittio janapatani gitade, Mylliem Syiemship-ni ning·ogipa Maikholi, Pillangkatta A, Longkhuli, Mawiong, Gambalbari, Jyrmang, Jolsyiem, Rangsakona, Chibra, Nongspung A aro Nongspung C dakgipa songrango A·chikrang an·tangtangko nokma ine dakjeenga aro iara Khasi Hills Autonomous District Council (Appointment and Succession of Syiem, Deputy Syiem, Electors, and Rangbah Shnong of Mylliem Syiemship) Act, 2007-ni ning·o dongimin niamko pe·ani ong·enga ine Passah aganaha.
Indake ong·engon, 2007 Act-ni Section 2-o janapgimin gitade Khasi Hills-o Khasi mandesa songni Rangbah Shnong ba songni nokma ong·na nanga aro uamang niam gita seokako man·giparang ong·na nanga inenba ua aganaha.
A·chikrang niamgri Khasi Hills-o nokma dake kam ka·asan ong·aija, uamang Meghalaya Transfer of Land (Regulation) Act , 1971-ni Section 3(1)-o dongimin niamrangko pe·enba, Khasi ong·gijagipa manderangna niamgri a·arangkoba palenga, unigimin Khasi Hills-o A·chikrang mamingdakeba nokma ong·na man·ja ine ua raken jegalataha.
