SHILLONG: A·doko scholarship-ni gimin neng·nikanirangna chinga chanchigrikaha aro uko namatchina gita ge·etanirangkoba on·aha ine Tura-ni MP aro Parliamentary Committee Personnel, Public Grievances, Law aro Justice-ni membor, Saleng A Sangma parakaha.
“Public Grievances, law aro justice-ni anga an·tangba membor ong·e chinga iarangni bidingo Parliamentary committee-na janapaha aro ia chanchigrikanio Union Social Welfare Minister-oni Director aro Joint Director donga aro ia neng·nikaniko namatchina chinga uamangko aganaha aro uko a·dokrangna watataha indiba neng·nikani dongkuaienga” ine Saleng aganaha.
“Minggipin ua obostarangni bidingo poraigiparangna chinga ramramgipa kamrangko de·e mesokaha, income certificate, awareness campaign-ko dakanikoba ra·galaha,” ua aganaha.
Uni aganani gita scholarchip form-rangko summit ka·na maming sal dona nangja, poraigipa chatro-chatrirangko dakchakna digital dongna nanggen aro income certificate-ko on·na bil on·ako ra·galna nanggen maina skango income certifacate-ko on·a nanggija dakbarongenga aro seokako man·gipa dilgiparangan uko on·enga.
“Scholarship summit ka·ani somaimitingo scholarship-ni bidingo chatro-chatrirangni phone ka·atako anga bang·en man·aha aro iani bidingo anga Union Minister-naba lekka seataha. Bil gnanggiparang aro chatro-chatrirangni gisepo meligrikjaenga aro uamang BDO-rangko aro officer-rangko sandia man·ja. Neng·nikbatgiparangoni mingsa poraigipa saksa ong·e uamang income tax-na affidavit ka·na nanga uan dingtangmancha poraigiparangna on·tisa krabeani ong·ja,” ua agandapaha.
Songgadam a·jolrangoni poraigiparang affidavit ka·na advocate-rangko aro ukil saksako agana paja aro neng·a, ua a·selko janapaha.
“Ia scholarship-ni bidingo neng·nikaniko da·o namatja ong·ode poraigipa bi·sarang neng·nikaniko man·angkuaigen,” ua agandapaha.
Indake ong·engon, sak 49,628 scholarship man·giparangna on·a scholarship-na gong kror 100 tangka-paisako a·dok sorkari man·aha.
