TURA: Skul aro college-rango poraienggipa chatro chatrirangoniko Aadhar card on·china bi·engani gimin, iani bidingo talataniko on·china gita South Garo Hills Greneth Sangma, a·dokni Education department-ko didiataha.
Iani bidingo, Directorate of Higher & Technical Education (DHTE) aro Mass & Elementary Education-ni Director-rangna sedoatengon, dingtang dingtang skul aro college-rango poraienggipa chatro chatrirangko, an·tangtangni Aadhar card-rangko on·china gita skul aro college-rang draenga ine Sangma matnangataha.
Aadhar Act 2016, Meghalaya Right of Children for Free & Compulsory Education Rules 2011, Constitution-ni Sixth Schedule aro 2018 bilsio Supreme Court-ni rai on·anioba skul aro college-rango poraianio Aadhar-na wataniko talen mesokmanahachim ineba Sangma parakataha.
Ia kosako on·gimin niamrangni gimin janapatengon, skul aro college-rango admission-na aro promotion-na Aadhar-ko nangtelgipa ong·ja ine skul aro college-rangna talataniko on·china, Aadhar-ko submit ka·jani gimin chatro chatrirangna sastirangko on·jachina skul aro college-rangna u·iatchina aro pilak skul-college-rangan ia niamrangko ja·rikchina gita Sangma, Directorate of Higher & Technical Education (DHTE) aro Mass & Elementary Education-ni Director-rangko didiataha.
