SHILLONG: Meghalaya a·doko sorkariko rikna man·genchimode VIP culture ba VIP-rangni dakbewalko bon·atna gita Voice of the People’s Party (VPP) ku·rachakaniko on·angaha.
“Sorkariko chalaienggipa manderangni siren aro rong gnanggipa kelkirangko jakkale bil mesokanirangko an·ching nikna man·aha. Iandake bilko jakkalsretengani a·selan ramram manderangsa neng·nikanirangko chagrongna nangskaenga. Uni gimin VPP sorkariona re·bagenchimode iandake manderangni neng·nikanirangko chel·chakna gita chinga VIP culture-ko bon·atgen,” ine VPP-ni dilgipa Ardent M Basaiawmoit aganaha.
Manderangna niamko taria ong·ode sorkariko dilenggipa manderangba ia apsan niamkon ja·rikna nanga ineba ua aganaha.
“VIP-rangni dakbewalko batrorona chinga on·jawa maina manderang baksa apsan bakrime kam ka·aniosa chingade bebera·a. Chingni dilaniode VIP-rangni dakbewal dongjawa maina an·ching pilakan apsan ong·a aro niamde pilaknan ong·a. Rong donggipa glass-rangko manderangna jakkalna on·jaenga ong·ode minister-rangba apsan daken niamko ja·rikna nanga,” ine Basaiawmoit aganaha.
Adita salrangna skang, Cherry Blossom Festival-ko ong·atanio, a·dokni Tourism Minister Paul Lyngdoh-ko re·dilangenggipa police escort gari bolsa, bike bolsako salgake a·sel ong·anichi ia bike-ko salgipa mande sina nangahani gimin VIP-rangni iandakgipa bewalko bon·atchina manderang dabitokengachim ine nikna man·a.
Garirango siren, andalatgipa glass aro ching·brakgipa light jakkalaniko champengna gita sorkari dingtangmancha niamrangko tarigen aro manderangna maming neng·nikanirangko on·na man·jana gita ia niamrangko bilaken ja·rikanggen ine adita salrangna skangsan, a·dokni Chief Minister Conrad K Sangma parakatskaahachim.
