SHILLONG: Meghalaya a·doko Bharatiya Janata Party (BJP)-ni MLA sakgni dongjagenchimode Meghalaya Democratic Alliance (MDA) sorkari be·gruaigen ine Tura-ni MDC aro BJP-ni state vice president Bernard N Marak-ni agananiko National People’s Party (NPP) jegalatenba, sorkariko rikanio dongimin Constitution ba niam bidikko name poraichengchina didiataha.
“Angni chanchiani gitade ua nomborkon name ma·sijakon. Meghalaya-o sorkariko rikna sak 30 MLA-ko nanga aro MDA-o bakrimenggipa membor-rang baksade chingo sak 45 baten donga. Ua constitution-ko name poraichengna nanga,” ine Robibar salo, a·dokni Cabinet Minister aro NPP-ni dilgipa Rakkam A Sangma aganaha.
Sorkariko rikna sak 30 plus MLA-rangko nanga ine janapatengon, “Anga bebera·a iakode ua ma·sienggen maina da·o chinga bakrimenggipa gipin MLA-rang baksa sak 45-na bataha. Uni gimin MLA sakgnide chingna maming nangchakeaniko ra·bajawa,” ine Sangma parakataha.
Manipur a·doko BJP sorkari baksa bakrimaniko watahaoba Meghalaya a·dokode NPP, BJP baksa bakrimaniko watna man·jawa maina Meghalaya a·doko sorkariko chalaina gita BJP-ko nangchongmota aro BJP gride MDA sorkari be·gruaigen ine adita salrangna skangsan BJP-ni state vice president aganahachim.
Manipur-o NPP-ni bakrimaniko ra·pilanian, so·sojengjeng ong·anirangko namatchina gita nangnikenganiko mesokani ong·a ine janapatskaengon, “Ian election-o nangchakeani dongja indiba Manipur a·doko ong·enggipa obostarangni giminsa ong·a. Manipur-o indita manderang siangna nangenga aro ian namen kragijani ong·a. Uni giminsa chinga Manipur-o BJP-chi chalaienggipa sorkari baksa bakrimaniko ra·pilaha,” ine NPP-ni Cabinet Minister aganaha.