SHILLONG: North Eastern Hill University (NEHU)-ni Vice Chancellor Prof Prabha Shankar Shukla-ni an·tangna chel·chakgipa sipai dolrangko on·dapchina bi·aniko knachakjachina didienba Hynniewtrep Integrated Territorial Organisation (HITO), Union Home Minister Amit Shah-na sedoataha.
NEHU-ni VC Prof Shukla, chuttina re·angaoni da·al December 2 tariko re·bapilengahaon, an·tangna chel·chakanirangko on·dapchina ma·mong sorkario bi·atahani gimin uni bi·aniko knachakjachina gita HITO, Union Home Minister-ko mol·molataha.
“NEHU-ni VC, ma·mong sipai dolrangoniko an·tangna chel·chakaniko on·china Home Ministry-o bi·ataha ine chinga kobor man·soaha. Meghalaya sorkarini on·enggipa sipairang, uni gadangna chu·ongjaenga ine ua a·kangataha indiba uni iandake bi·aniara maming pangchakani grisa ong·enga ine chinga nikna man·a. Central Armed Force ba ma·mongni sipai dolrangko a·song gimikni namgnina chel·chakna gitasa donaha aro saksani namgnina maming dakeba ia sipairangko jakkalna nangja,” ine Robibar salo, HITO-ni Union Home Minister-na sedoatgipa chittio janapataha.
NEHU-ni VC-na iandake sipai dolrangko chel·chakna on·dapgenchimode ua NEHU-ni chatro chatrirang aro kam ka·giparangni kosako ong·gija dake sipairangko jakkalani cholrang donga ineba HITO, Union Minister-na seatgipa chittio janapataha.
Bang·a somoirangon NEHU-ni VC, biltangko ong·gija dake jakkalaha ine matnangatskaengon, ua Hynniewtrep manderangni daka rikanirangkoba dal·e ra·gijagipa ong·a ine parakataha.
