SHILLONG: Adita salrangna skang, Gambegre by-election-ko chee da·o Assembly-o doltangari sorkariko chalaina bilrang chu·ongahani gimin Garo Hills-o National People’s Party (NPP)-ni mitam MLA-rang, MDA 2.0 cabinet-o NPP-na biapko on·dapchina nangnikenganiko paraktokaha.
Gambegre seat-ko cheani ja·man da·o NPP-o gimik sak 32 MLA-rang gapdoangaha aro ianoni sak 19 MLA-rangde Garo Hills-onin ong·engachim.
Kobor on·timgiparangni u·iatani gitade, Cabinet-o United Democratic Party (UDP)-na on·enggipa seat damgnionin damsako ra·skachina ba Hill State People’s Democratic Party (HSPDP)-ni minister Shakliar Warjri-ni biapko ra·skachina NPP MLA-rang nangniktokenga.
MDA 2.0 Cabinet-o gimik sak 12 minister-rang donga aro ianoni sak 8-de NPP MLA-rang ong·e, sakbride Garo Hills-oni aro sakbride Khasi-Jaintia Hills-oni ong·engachim. Cabinet-ni bangki dongenggipa seat dambrikode MDA-o NPP baksa bakrimenggipa political dolrangni gisepo suale ra·skaenga aro uan ge·gnikode UDP, ge·sako HSPDP aro ge·sako BJP-na on·engachim.
Indake ong·genchimoba, da·o dipet MDA Cabinet-ni ning·o maming dingtangatani dongkujawa aro a·bachengo gitan Cabinet-ni biaprangko, MDA-o bakrimenggipa dolrang baksa sualgrike ra·aikugen ine a·dokni Chief Minister aro NPP-ni national president Conrad K Sangma parakatskaaha.
Uni iandakgipa kattarangni bidingo janapatskaengon, MDA aro NPP-ko dilenggipa Conrad Sangma an·tangde gipin political dolrangko gisik saatna nangnikjae, apsan daken cabinet-ni biaprangko donangkuna aganenga indiba ua party MLA-rangni nangnikanirangko maikai knachakgija dongskana man·gen ine mitam dilgiparang sing·doangaha.
Adita salrangna skang ong·atanggipa Gambegre by-election-ko NPP-ni candidate aro Chief Minister Conrad Sangma-ni jikgipa Mehtab Chandee A Sangma cheangahachim aro uandaken da·o NPP-ni MLA-rang Assembly-o gimik sak 32 gapengahachim.