TURA: South Garo Hills a·jao Meghalaya Police (MLP)-ni 7th Battalion-ko songchina aro Mindikgre songo police outpost kulichina dabienggipani bidingo South Garo Hills a·jani social activist Greneth M Sangma, a·dokni Chief Minister-na gisik ra·atpiltaianiko on·angaha.
South Garo Hills a·jao 7th MLP Battalion-ni headquarter-ko songchina aro Mindikgre songo police outpost-ko kulichina gita 2021 bilsimangonin South Garo Hills a·jao songdongenggipa manderang dabitokengachim ine nikna man·a.
Iani bidingo a·dokni Chief Minister-na gisik ra·atpilaniko on·angengon, “Chingni dabianirangko chu·sokatna jotton ka·engani gimin chinga sorkariko mittelpilna ska. South Garo Hills a·jao 7th MLP Battalion-ni headquarter aro Mindikgre songo police outpost-ko songchina gitaba chinga batanggimin bilsirangonin dabiengaha aro chinga ka·donga, chingni dabianirangko sorkari chu·sokate on·chongmotgen,” ine Sangma parakataha.
7th MLP Battalion project-ko South Garo Hills a·jaona ra·bana krengengani gimin a·dokni Cabinet Minister aro Rongara-Siju MLA Rakkam A Sangma-ko mittelpilangengon, South Garo Hills a·jara Meghalaya a·doko gitchambatsranggipa a·jarangoni damsa ong·engani gimin aro gipin district-rangode MLP battalion-rang dongmanahani gimin ia 7th MLP Battalion-ni headquarter-ko South Garo Hills a·jaon donna nangchongmotenga ine Sangma parakataha.