TURA: East Garo Hills a·jani Rongjeng-o donggipa Meghalaya Cooperative Apex Bank (MCAB)-ni jakkalenggipa nok namsrangjaha ine Rongjeng-ni dingtang dingtang NGO-rang, chong·motan GSU, AOSW, NGCO, APA, FKJGP aro GSMC dolrang parakatenba, ia bank-na gital building-ko ta·raken rikchina dabiangtokaha.
Iani bidingo Rongjeng-ni NGO-rang, East Garo Hills Deputy Commissioner (DC)-ni jako, MCAB-ni Chairman-na chittikoba sedoataha.
NGO-rangni parakatani gitade, Rongjeng-o MCAB-na jakkalenggipa nokara namen apchangketa aro ia noko manderangni nangchongmotgipa cholrangba dongjachim.
Ia gitcham building-o bank-ni counter-rangko nirokna gita kam ka·giparangba chu·ongja ineba NGO-rang matnangataha.
MCAB-ni gital building-ko rikna plan aro estimate-ko on·manahachim indiba iako Board-ni Managing Director aro Chairman jegalaha ineba NGO-rang, suk ong·gijaniko parakataha.
Bank-rango manderangna dangdike on·aniko namdapatna nangchongmota ine janapatengon, Rongjeng MCAB-na dongimin biapon gital building-ko ta·raken rikchina NGO-rang dabiangtokaha.