SHILLONG: Autonomous District Council (ADC) election-ko chegipa darang dolan National People’s Party (NPP)-ni bakrimani gride Executive Council (EC)-ko rikna man·jawa ine NPP-ni dilgipa aro a·dokni Cabinet Minister Ampareen Lyngdoh a·kangataha.
“Ia sal somoirango pilakan ding·chaoatako man·tokenga gita nika indiba somoi sokahaosa an·ching obostarangko ma·sigen. MDA-o da·o bilsi gittam somoi dongkuengani gimin darangba chingko onnikna man·jawa. District council election-o sawa chea uade maming ong·ja indiba na·a sorkariko chalaienggipa party baksa apsan bakrimjaenga ong·ode Executive Council-ko chalaianio bang·e tangbangjawa,” ine Lyngdoh aganaha.
Mikkang bilsio ong·atna sienggipa KHADC aro JHADC election-o Voice of the People’s Party (VPP) chegopna ka·dongsotokengani gimin ua ia kattarangko aganaha.
“Anga iako agantaina ska, chong·motan India a·songni politics-de namen dingtanggipa ong·a maina an·ching mamingkoba agansona man·ja. Anga NPP-na agre gipin dolrangni gimin aganna sikja. Chinga kamrangko name ka·enga aro indita chasongrangna chu·sokatgijagipa kamrangko chinga chu·sokataha. Chinga manderang baksa meli-nangrime dongna jotton ka·enga,” ine Lyngdoh aganaha.
District council election-o sawa chegen ukoba ua agansona jechakaha indiba District council election-o chegipa ong·na gita NPP rakbee kamko ka·gen ine ua aganaha.
“Chingni membor-rang rake kamko ka·na nanggen aro anga ka·donga uamang namgipa report card-rangko man·gen,” ine NPP-ni dilgipa aganaha.
Indake ong·engon, party-ko dilenggipa manderangni gipinrangko party-tango napchina okamaniara maming ong·gijani dongja maina ian party-tangtangko mangrakbatatna miksonge dakanisan ong·aia ine NPP-ni dilgipa aro a·dokni Deputy Chief Minister Sniawbhalang Dhar parakatskaaha.
“Anga an·tangni party-nasa kam ka·enga aro gipinrangba apsan daken an·tangtangni party-nasa kam ka·enga. Pilakan party-tangtangko bilakbatatna nangnikesa kamko ka·eng,” ine Dhar, talataniko on·angaha.
Ua Congress-ona re·bapilani cholrang dongama ine sing·anina aganchakaniko on·angskaengon, “Angni nikani gitade NPP-an nambatgipa ong·aia. Apsan daken Congress dolni membor-rangba aro UDP-ni membor-rangba an·tangtangni party-kon namnikbattokaigen,” ine Dhar aganaha.
JHADC election-na NPP-ni skanggipa candidate list-ko da·o salsa salgnini gisepon parakatgnok aro uni ja·man gnigipa list-ko Krismasna skang parakatskagen ineba Dhar aganaha.
