‘Road scam’-ko CID-ni sandirokanio somoi nangkunaba gnang

SHILLONG: Krorni kror ong·gipa Shillong-Nongstoin-Rongjeng-Tura ramako tarianio bang·en tangka paisarangko jakkalsreta aro ong·gija dakanirang donga ine matnangenggipani bidingo Crime Investigation Department (CID)-ni sandirokanio adita somoirangko nangkunaba gnang.

Kobor on·timgiparangni u·iatani gitade, ia case-ara namen ning·tugipa ong·ani gimin ia case-ni bidingo kakketko ma·sina sandirokanio che·em che·em dake am·sandina nangkuenga aro uandaken ia case-ko sandirokanio CID-ni official-rang, bewal somoiko ra·kunaba gnang.

Ia project-ara ma·mong sorkarini Special Road Development Program-North East-ni ning·o 2010 bilsio ra·chakgipa project ong·achim aro ia ramako tarina gita a·bachengo gong kror 1,303.83 koros hisapaoni ja·mano gong kror 2,366.77-ona tang·doangahachim.

Iani bidingo FIR-ko PWD (NH)-ni Chief Engineer AM Kharmawphlang, Arbitral Tribunal-ni am·sandie man·anio pangchake ka·ahachim.

Shillong-Nongstoin-Tura ramako tarianio tangka paisarangko jakkalsreta ine matnangenba, a·dok sorkarini engineer-rang baksana Telangana aro Haryana-ni company ge·gnio kam ka·gipa official-rangko man·chape gimik saksku manderangni kosako FIR ka·ahachim ine nikna man·a.

Iani bidingo police-rang, nangchongmotgipa lekkarangko chimongchina Public Works Department (PWD)-na u·iataniko on·aha aro uandaken da·o lekkarangko man·soani ja·man CID, sandirokani kamrangko a·bachengatahachim.

Ia case-ko sandirokna gita a·dokni CID, MPS officer Bipul Das-ko Investigation Officer dake songaha.