SHILLONG: South Shillong MLA, Sanbor Shullai, Christmas manina constituency-tangni dingtang dingtang giljarangni committee-rangna gong lak 6 tangkako mejalo on·aha aro sakantina Christmas-ni nama-skani aro tom·tomani aro ku·mong-nangrimani kattarangko aganaha.
Mejal Sonibar salo Sanbor Shullai, ua an·tangan pre-Christmas manianiko ong·ataha aro an·tangni dormahaoniko giljani committee-rangna tangka-paisako on·e dakchakaha.
Tom·ao aganao, dingtang dingtang jat manderang Christmasko manienga ine agane pilak jat aro manderangni gisepo tom·tome meli-nangrime dongna ua ku·mongrimaha.
Maming neng·nikani gri manderang Christmas-ko manina man·a gita je chol man·a an·tangni nambatako dakna jotton ka·gen ine ua aganaha.
Tom·ao Carol-rangko dakaha aro a·joltangni chadambe dolni doka-damgipa Shipara gitrangko ring·e manderangko an·saoataha.
U·IATTIMGIPAONI
Shillong: Barapani na·gil ka·gipa gita ramako taripiltaiani kamrang matchotmane adita jarangna re·pilahaoba dal·dalgipa garirangko re·na watkujani bidingo power minister Abu Taher Mondal uni aganao manderangni naljokanina watkujaenga ine aganaha.
“Bang·arangan ua ramako re·na man·kujae namen neng·nikaniko chagrongani gimin anga kema bi·na ska taritaigipa kamrang bilsi 15-20-ona na·gilni baiani ong·gen ine aganengon skanggipa na·gilni naljokanina dal·dala garirangko watkujaenga,” ua aganaha.
“Maibakai uan ong·telaigipa obostao pangchakgen.” Chi kamachi dongenggipa manderangni aro na·gilko re·giparangni naljokanina na·gil ong·enga. “Unigiminsa chinga na·gil kagipa rama gita dal·dala garirangko re·aniko champengatkuenga,” ua aganaha. Ru·utgijaan Shillong-ona gipin ramako sorkari dake on·gen, ua aganaha.
Napram cholguga damgnio gari gimikkon raken chek ka·china BJP dabia
U·IATTIMGIPAONI
Shillong: BJP-ni South Shillong MLA Sanbor Shullai-chi ka·dilgipa meeting-o Meghalaya-ona pekgipa samrangko badingsrukaniko rim·na Ri Bhoi district-ni Byrnihat-o aro East Jaintia Hills-ni Ratacherra-o ia ge·gni entry point-rango garirangko raken chek ka·china gita dabiaha.
Songjinmani bang·a biaprangon cha·ugiparang bang·ani gimin gittimtangtango walo raken patrolling ka·na gita joltangni manderang baksa meeting-o chanchiaha.
“Chief Minister, prime minister ba badingchiwalgipa ba jeba private ba para salgipa gari ong·chong an·ching chek ka·ode gimikkon ka·na nanggen, indake an·ching chek ka·ode an·chingni a·doko ia pekgipa ringa-cha·aniko bon·atna man·gen anga ka·donga,” ua aganaha.
Re·anggipa changni MDA meeting-o ia obostako janapaha aro de·e mesokanirangko chief minister Conrad K Sangma, deputy chief minister in-charge Home Prestone Tynsong aro social welfare minister Paul Lyngdoh-na on·aha, ua aganaha.
Pekgipa ringa-cha·aniko gimatna sorkari ja·ku de·enga indiba ja·ku de·anirang chu·ongkujaenga,’’ Shullai aganaha.
Pekgipa ringa-cha·anio ga·akgipa manderangna rehabilitation centre-rangko songdapna nangenga.
Shillong-o cha·ugiparang bang·ani giminba suk ong·gijaniko janape, cha·ugiparang gilja nokrangokomangba watjaha.”
Laithumkhrah-o Catholic Cathedral, Laban-o Unitarian Church aro Adventist Church-oniko do·garangko dokdrake gamchata malrangko cha·uaha, Isolni nokkomangba watjaha, ian dal·begipa a·sel ong·a, ua aganaha.