SHILLONG: Meghalaya a·dokni AYUSH hospital-rango kam ka·giparangna dormaharangko komibate on·enga ine Shillong-ni Lok Sabha MP Ricky AJ Syngkon parakatenba, kam ka·giparangna dormaharangko nambate on·china didie, Union AYUSH Ministry-na sedoataha.
Union AYUSH Ministry-na sedoatgipa chittio Shillong MP-ni parakatani gitade, Meghalaya a·dokni AYUSH 10-bedded hospital-rango kam ka·enggipa medical officer-rangna japrako gong 32,000/- ka·esan dormahako on·enga aro ian National Health Mission (NHM)-ni ning·o songako man·e gong 45,500 baksana bilsiprako 5 percent increment man·enggipa AYUSH medical officer-rangna bate namen komibatenga.
“Iandake AYUSH-o kam ka·enggipa medical officer-rangna dormahako komibate on·aniara, manderangni an·seng baljokanina an·tangtangko on·kange kam ka·enggipa officer-rangko onchepani gita ong·enga,” ine Syngkon parakataha.
Syngkon-ni parakatani gitade, AYUSH 10-bedded hospital-rango kam ka·enggipa medical officer-rang, antio salsni aro salo konta 24 kam ka·na gita nangenga indiba ia officer-rangna dormahako komibate on·aniara uamangni kamrangko mande ra·gijani gita ong·enga.
Meghalaya a·dokni dingtang dingtang national program-rangni ning·o kamko ka·enggipa contractual worker-rangba, dingtang dingtang man·gni aro bilsio dormaha bariataniko man·patokenga ine janapatengon, AYUSH hospital-rango kam ka·enggipa medical officer-rangde iandakgipa namgnirangkoba man·pajaenga ine Shillong MP parakataha.
Meghalaya a·doko AYUSH 10 bedded hospital-rang, nanga gita dakchakanirangko man·jaenga ine janapatskaengon, AYUSH-o iandake sanna banani cholrang chu·ongjaengani giminan bang·a manderangan AYUSH-ko sanna banna gita jakkaltokjaengaha ine Syngkon parakataha.
