SHILLONG: Re·baenggipa bilsio ong·atna sienggipa Autonomous District Council (ADC) election-rangna pilak political dolrangan tarisamsotokengahaon, ia election-o dolsa dolska baksa susagrikgenchimoba District Council-ni dingtang dingtang nanganirang, jekai Sixth Schedule-ko taridapani aro uandakgipa gipin nangchongmotgipa kamrangko gualjachina United Democratic Party (UDP), gipin political dolskarangko didiataha.
Batanggimin sal somoirango NPP aro dingtang dingtang dolrangni matnanggrike agangipa kattarangni gimin janapatengon, “Political dolrangni gisepo matnanggrikani aro susagrikanide ong·rongbewalsan ong·aia indiba an·ching district council-ni miksongani, chong·motan, Tribal manderangni bilko chel·chakani aro warachakaniko pangnan gisik ra·na nanga. Manderangni nangnikanirangko gelaniara Sixth Schedule-ni miksongani aro niamrangkon donmitapani gitasa ong·engaha,” ine UDP-ni general secretary Jemino Mawthoh aganaha.
“Sixth Schedule-ko taridapna kam ka·aniara pilak political dolrangni bak ong·paanian ong·enga aro iano ge·san political dolni jak ong·ja. ADC election-na dingtang dingtang political dolrang an·tangtangko tarisamsotokengahaon, mitamrangde an·tangtangna politics-ni gita man·dapaniko rikskaenga,” ine Mawthoh aganaha.
Election-o chena gita krenge susaengoba district council-ni nangchongmotgipa kamrangkode gualna gita nangja ineba ua aganaha.