TURA: Mongolbar pringo, niam gri bol salangenggipa gari bolsako police-rangni rikengmiting somoio, songni manderang police-rangni gariko chadrapenba nosto ka·aha.
Koborko on·ani gitade, ia a·sel ong·ani, Rajabala police station-ni ning·o donggipa Phersakandi songo ong·aha.
Ua somoio niam gri bol salangenggipa gari bolsako police-rang nikenba, champengsona jotton ka·ahachim indiba ia gari, Phersakandi songni mande jelbra jelsugipa biapchipak sale katangaha aro ia gariko police-rang rim·na rikangon, songni manderang, bol cha·ugiparangko jokatna police-rangni gariko jinma changduulskaaha. Songni manderang, police-rangni gariko mikkang aro ki·sangchini nosto ka·eba galaha.
Ia a·selni bidingo talataniko on·atengon, “Ia a·sel ong·ani ja·man da·o obostarang namangaha indiba chinga ia a·selni bidingo mokordomako segatenga. Police-rangni gariko chadrapdilanio jak donggipa adita sak manderangko chinga ma·sina man·aha aro ia manderangni kosako chinga nanga gita ja·kurangko de·anggen,” ine Mongolbar attamo, West Garo Hills a·jani SP Abraham T Sangma parakataha.
West Garo Hills a·jani a·kawe jolrango, mongsongbate Hallidayganj-oni Tikrikilla jol batpilen, niam gri bol badinganirangko nikna man·engachim.
Batanggimin somoirango niam gri bol badinggiparangko Forest aro Police department, bang·en rim·na man·ahaoba da·onan niam gri bol badinganiko champengsrangna man·kujaengachim.
