SHILLONG: Re·baenggipa bilsini a·bachengachibara ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o susana sikenggipa candidate-rangko dorgasto galchina Meghalaya a·dokni Bharatiya Janata Party (BJP) didiataha.
Dorgastorangko re·baenggipa December 30 tarikni gisepon district-tangtangni president-ona sokatchina gitaba BJP-ni dilgiparang u·iataha.
Seoka man·gipa candidate-rangni bimingrangko re·baenggipa bilsini January 5 tariko State Election Commission-ona watatskagen.
Meghalaya a·doko BJP-ko dilenggipa manderangni u·iatani gitade, district council election-o BJP, kraa gita seat-rangko chegenchimode dingtang dingtang songrangko chalaienggiparangna direct funding-ko on·na gita uamang kamko ka·gen aro ian songko nokko dilenggipa nokma-sordarrang aro dingtang dingtang dolrangko mangrakbatatani gita ong·gen.
KHADC aro JHADC election-ko re·baenggipa bilsini February 22 tariko ong·atnaba gnang ine ka·dongsona man·engachim.
KHADC aro JHADC election-ko ia bilsini gisepon ong·atani ong·ahachim indiba constituency-rangko gital dake sualpiltaiahani gimin ia district council damgnini term-kon jadokna ra·dodapatahachim.
KHADC (Constitution of District Council) (Amendment) Rules, 2024, aro JHADC (Constitution of District Council) Amendment Bill, 2024-ko a·dokni Governor CH Vijayashankhar ra·chakangani ja·man KHADC aro JHADC-ni election-ko ong·atna skang, constituency-rangko sualpiltaina a·bachengataha aro uandaken da·o ia district council damgnio susana sienggipa candidate-rang, sualtaigimin gital constituency-rangoni susana tarisamsotokskaengaha.
