SHILLONG: National People’s Party (NPP)-chi dilenggipa Meghalaya Democratic Alliance (MDA) sorkari, 2018 bilsion a·dokna Inner Line Permit (ILP)-ko man·e on·na ku·rachakahaoba da·alonan be·en pil·chipkujaengani gimin a·doko ILP-na dabidilenggipa Khasi Students Union (KSU), a·dok sorkariko matnangataha.
“ILP-ko ra·gatna sorkari gisik nangjaenga gita nika maina bang·a changon uamang, New Delhi-ona re·ange ma·mong sorkarini dilgiparangkode grongenga indiba da·alonan ILP-na dabiani chu·sokgipa ong·na man·kujaenga,” ine KSU-ni president Lambok Marngar parakataha.
“Chingaba ma·mong sorkario bilaken ILP-na dabienga indiba ILP-ko man·e on·na gita ma·mong sorkariko didiani kamde a·dok sorkarinisa ong·a,” ineba ua aganaha.
Meghalaya a·doko niam gri napsrukanirangko champengna gita KSU, rakgipa niamrangko ra·gatchina nangnikenga ine janapatengon, Meghalaya Residents Safety & Security Act (MRSSA) 2016-ko ra·gatkujaengani giminba KSU-ni president, a·dok sorkariko sing·doataha.
ILP-ni bidingo ma·mong aro a·dok sorkarioniba maming u·iatanirang dongkujaenga ine an·tangni suk ong·gijaniko parakatengon, ILP-ni bidingo KSU aro a·dokni manderangba da·onan maming u·iatanirangko man·kujaenga ine Marngar aganaha.
“ILP-ko on·genma on·jawa a·dokni manderang, ma·mong sorkarini talatanina senge dongtokenga indiba da·onan ma·mong sorkari, iani bidingo mamingkon dakjaenga. Ian manderangni ku·rangko ma·mong sorkarini knachakna gisik nanggijaniko mesokani ong·enga,” ine ua aganaha.
2019 bilsini December jaon Meghalaya Assembly-ni pilak sak 60 MLA-rangan, ILP-ko ra·gatchina ma·mong sorkari dabie resolution-ko pass ka·ahachim ine janapatengon, “Manipur-na ILP-ko on·na man·aha ong·ode maini gimin Meghalaya a·dokna on·na man·skajaenga?” ine KSU president sing·doataha.
