SHILLONG: Assam-Meghalaya sima ariko tik ka·na bangki dongenggipani bidingo agangriktaina gita re·mikkanganio, Assam Sorkarian da·o dipet jripmittip dongenga, aro agangrikaniko donchipa da·o adita jarang ong·angpilaha.
“Border Committee-ni member ong·e, West Khasi Hills regional committee chairman Paul Lyngdoh baksa chinga chingni bil ama gita kamrangkode ka·aha indiba da·o dipet Assamni aganchakaniko mamingkoba chinga man·sokuja’’ ine Rambrai-Jyrngam MDC Bajop Pyngrope koborna parakaha.
Da·o by-election-rangba matchotangahani gimin dongspa sima arini bidingo gnigipa gadangni agangrikaniko haida ru·utgijan a·bachengna man·gen ine Pyngrope uni ka·dongsoaniko parakaha aroba Chief Minister-ba iana kamrangko ka·enga ineba ua aganaha.
Lok Sabha election aro puja holiday indakgiparangko mingsa minggni a·selrangko pa·sikenba sima arini bidingo gnigipa changni agangriko bilsi batpile donchipenga ineba ua aganaha.
Biap-adammanchao, mongsongbate Langpih sector-ni obostarangko sing·anina aganchakengon, biap-bichamanchaonan a·doktangni boundary committee-rangni re·anganiko songdonggipa manderang nichakenga ine Pyngrope aganaha.
Indake jeje songrangkon Meghalaya-o chapatako nangnikengachim, uarangko West Khasi Hills committee, Assam sorkarina mesoke on·manjok ine Pyngrope agandapaha.
