Tura: Re·anggipa Bristibaro West Garo Hills-ni Gambdgre-ni ning·ogipa Dinasagre Dampela Adugre-o Mongma kal·ake siatgipa sakgni manderangna ex-gratia-ko on·gen ine West Garo Hills Deputy Commissioner Jagdish Chelani parakaha.
Dangsapara songoni saksa bilsi 62 ong·gipa Ajit A Sangma-ko uni baganko dilnengmiting somoio buringni mongma uko doke siataha.
Uni ja·mano apsan songonin saksa bilsi 55 ong·gipa Walmi Ch Marak-koba Adugre joloniko am·bol chimongmitingo mongma kal·ake siataha. Koboro gita uko buringni mongma ga·prete siataha.
Minggipin a·sel ong·anio, songgipinoni sakgni me·chikrangkoba mongma kal·akenba bilongbee saknaate donangahachim.
Garo Hills-o bang·a biaprangon buringni mongmarangni mande kal·ake galanirangko bang·bata somoirangon nikna gita man·enga.
Indake ong·engon, mong·ma kal·akako man·e sianggipa nokdangni manderangna ex-gratia-ko on·gen ine Deputy Commissioner Chelani aganaha.
Unomitingo Sorkari ex-gratia-ko lak 5 ka·e on·engachim, indiba ru·utgija somoirangna skango bariataha ineba ua aganaha.
