SHILLONG: Mawsynram-o donggipa Mawjymbuin cave ba rong·kolo Hindu-rangni olakkianiko champengatahani gimin Assam a·dokni Kutumba Suraksha Parishad (KSP), Meghalaya-ona dakbagipa ramako champengatskana ka·mikkenataniko on·angani ja·man, iako jatgnini gisepo ding·chaoatjachina Khasi Students Union (KSU) mikrakataniko on·angenba, ia Mawjymbuin cave-ara olakkiram biap ong·ja indiba tourist-rangni rochakgipa biapsa ong·a ine talataniko on·angaha.
KSU-ni president Lamborstar Marngar-ni aganani gitade, iandake KSP dolni Meghalaya a·dokona dakbagipa ramako champengatna ka·mikkenataniara chonchongipa Tribal jatrangni bilko ra·sekna jotton ka·anisa ong·enga.
Mawjymbuin cave-ko Mawsynram Dorbar Shnong-sa jako ra·enga ine janapatengon, Mawjymbuin cave-ara gipin biaprangoni re·baenggipa manderangni rochakgipa biap ong·ani giminsa Mawsynram songni dilgiparang, ia cave ba rong·kolo Hindurangni olakkianiko champengna tik ka·aha ine KSU president parakataha.
Marngar-ni aganani gitade, ia Mawjymbuin cave-ko Mawsynram Dorbar Shnong-sa nirokenggipa ong·a aro Hindurangni ia rong·kolo olakkanichi jabol dakani giminsa uamang ia biapo Hindurangni olakkianiko champengatahachim.
Meghalaya a·dokni kosako KSP dol, iandake sinjetaniko on·na jotton ka·a ong·ode KSU nie dongskajawa ineba ua mikrakataniko on·angaha.
“KSP-ni ja·ku de·aniko chinga nie dongkuna nangnikenga gimin da·o dipet mikkangchi chingni ja·ku de·gniko chinga chanchia dongkuja,” ine Marngar aganaha.
Mawjymbuin Cave ba rong·kolko Hindu olakkigiparangna sal 10-ni gisepon kulie on·piltaijagenchimode Assam aro Meghalaya a·dokni gisepo re·a doani cholrangko champengatgen ine KSP dolni ka·mikkenataniko on·angani ja·man, manderang rong·kolrangosan ong·aigija noktangtangoba an·tangtangni Isolrangko olakkina man·a ine Meghalaya a·dokni Education Minister Rakkam A Sangma-ba aganahachim.
KSP dolni iandake rama champengna ka·mikkenataniko jegalatengon, toromko dilgipa dol ong·e iandake ka·mikkenatani kattarangko agananiara kraani ong·ja maina pilak toroman tom·tomani aro ku·mong nangrimanikosa bebera·a ineba Sangma aganaha.
“Mawsynram-ni rong·kolo olakkiaiani giminsande pattianiko man·gen ong·ja, na·simang noktango aro Assam-ni dingtang dingtang mite nokrangoba olakkina biaprang bang·en donga. Isolde pilak biapon donga, uni gimin na·simang noktangon mite nokko rikna man·a,” ineba ua aganahachim.
