SHILLONG: Meghalaya a·dokni SSA skulrango skigiparangni kamko naljokatna gita a·dokni Education department, niamko tarina name chanchichengenga ine Mongolbar salo, Education department-ni Commissioner & Secretary Vijay Kumar, Meghalaya SSA Schools Association (MSSASA), All Meghalaya SSA Schools Association, All Meghalaya Fourth Teachers Association (AMSSASA) aro All Meghalaya Fourth Teachers Association (AMFTA) gita dakgipa dolrang baksa tom·e chanchirimanio parakataha.
Mongolbar salo, Education department-ni official-rang baksa Main Secretariat-ni conference room-o tom·e chanchirimani ja·man kobor ra·timgipa manderang baksa agangrikengon, SSA skigiparangni kamko naljokatna gita Education department-ni Detailed Action Plan-ko January 10 tariko Cabinet-ona ra·anggen ine MSSASA-ni president Aristotle Rymbai aganaha.
Education department-ni ra·anggipa detailed action plan-ko ra·chakama ra·chakja uade Cabinet-ni jakosa ong·gen ineba ua aganskaaha.
Empowered Committee-ko songani bidingo skigiparangni ku·pattianiko sorkari baksa agangrikna Education department-ni Commissioner & Secretary ku·rachakaha ineba Rymbai parakataha.
Ia empowered committee-o Law, Personnel, Finance, Planning aro Education department-ni official-rang baksana dingtang dingtang skigiparangni dolrangonikoba bak ong·atchina MSSASA-ni dilgiparang ku·pattianiko on·atahachim ine nikna man·a.
Skigiparangni jingjengatna manchianiko ra·galenba, sorkari baksa agangrikangkuna manchianiko sorkari ra·chakaha ineba MSSASA-ni president parakataha.
2020 bilsini July 1 tarik ba una skang kam ka·sogimin pilak SSA skigiparangkon, Meghalaya Teachers’ Eligibility Test (MTET)-oniko watchina dabienggipani bidingo sorkari, Advocate General-ni ku·pattianiko ra·na tik ka·aha ineba Rymbai parakataha.
MSSASA president-ni parakatani gitade, Education Minister Rakkam A Sangma-ni ku·rachakgimin gitan da·o antigni antigittamni gisepon bangbang ong·e dongenggipa skigiparangni kamna Education department, advertisement-ko on·na ku·rachakataha.
