NGH-o driver saksako so·otanio jak donggipa mande saksako rim·dapa

TURA: Ia bilsini January jao North Garo Hills a·jani biap damsao, Rongjeng-ni chadambe saksako so·otanio jak donganina police-rang, mande saksako rim·dapna man·aha.
Ia chadambeara, East Garo Hills a·jao donggipa Rongjeng songni Udoy M Sangma ong·achim aro uni manggisiko January-ni 15 tariko, North Garo Hills a·jani Rongbu aro Mendima songni gisepo donggipa rama sambaoniko man·ahachim.
Ia chadambeko so·otani bidingo sianggipa chadambeni gumetang, Rongjeng police station-o FIR ka·aha aro uandaken ia a·selni bidingo police-rang am·sandienba, dos dakgipa mande sakgittamkode rim·na man·ahachim.
FIR-o janapani gitade, sianggipa chadambe Udoy M Sangma-ni gariko, West Khasi Hills a·jao donggipa Shallang songni mande sakbonga, Assam a·dokni Goalpara a·jao donggipa Dudhnoi-ona para ra·angaha aro uamang una gong 4000-ko gamna ku·rachakahachim. Ia garini nomborara AS-01EQ 7779 ong·achim.
Apsan salon, garini nokgipa aro driver Udoy Sangma, an·tangni jikgipana mobile location-ko watataha indiba uni ja·mande uni mobile phone off ong·aiahachim.
“Uni manggisiko January 15 tarik pring 7:30 bajimango Upper Rongbu songni manderangsa nikaha indiba uni gari aro uni mobile phone-de uko so·otgipa manderangan ra·e kataha,” ine sianggipa chadambeni gumetang, FIR-o parakahachim.
Indake ong·engon, ia a·sel ong·anio jak donggipa gipin sakgnini giminba police-rang ma·sina man·aha aro uandaken ia a·sel ong·anio jak donggipa sakgipin Terry Sangma-ko Kharkutta police station-ni sipairang, Police Reserve-ni sipairang baksa, Mongolbar pring 4:00 bajimango, Bolmedang songoniko rim·na man·aha ine kobor on·aha.
“Rim·a man·gipa mandeko kachario mikkangpaataha aro da·o saksako rim·na nangkuengani gimin rim·a man·gipa mandeko sing·sandikuna gita salgnina police-rangni ning·o donkuchina kachari raiko on·ataha. Ia mande batanggimin ja 10-na police-rangoni kate dongengachim,” ine North Garo Hills a·jani police official-rang parakataha.
Ia a·sel ong·anio jak donggipa sakgipin Mathew Momin-ko police-rang rim·na sandikuenga ineba kobor on·aha.
Ia bilsini January jao Rongjeng-ni chadambe saksako so·otanio jak donganina rim·ako man·gipa sakgipin mande.