NEW DELHI: ‘One Nation, One Election’ (ONOE) Bill-ko Mongolbar salo, Union Law Minister Arjun Ram Meghwal, Lok Sabha-o Parliament-ni membor-rangna mesoke on·angaha indiba ia Bill-ko Opposition dolrang jinma chakatenba jegalgrimtokskaaha.
Ia ONOE Bill-ko jegaltokengon, ian a·songni niam bidik gita ong·ja aro democratic-ni kosako ong·a ine Opposition membor-rang, ia Bill-ko ta·raken ra·pilchina dabitokaha.
Indake ong·genchimoba, Opposition Congress membor-rangni jegalaniko Union Home Minister Amit Shah jegalatskaaha aro iandake namana ra·gatenggipa niamrangko Congress dolni jegalaniara ‘ranta’ gitasa ong·engaha ine matnangskaaha.
Ia ONOE Bill-na BJP baksa NDA-o bakrimenggipa TDP dolde chakpaaniko on·skaaha aro ian a·songni tangka paisani gita korosko komiatanisan ong·aigija election-o koros ong·aniko 40 percent-na baten komiatgen ine parakataha.
Ia ONOE Bill-ko jegalgipa gipin dolrangara, Trinamool Congress, Samajwadi Party, Shiv Sena (UBT), AIMIM aro gipinrang ong·a.
Ia ONOE Bill-ko ia dolrang pilakan, Indian Constitution-ko chonnikani aro a·songni democracy-ko so·otani gitasa ong·enga ine matnangtokaha.
Ia ONOE Bill-ko AIMIM-ni dilgipa Asaduddin Owaisi jegalatengon, ia niamara pilak regional party-rangko bon·atsrangna miksonge ra·baenggipa niam ong·a ine matnangataha.
Ia Bill-kon ra·baengani gimin BJP-chi dilenggipa NDA sorkariko matnangatengon, “Ian badiaba party-na chu·gimik namgniko ra·bana miksonge dakanisa ong·enga aro ian president rule gita dakgipa sorkarina rama tarianisa ong·enga,” ine Owaisi aganaha.
Ia ONOE Bill-ara, Lok Sabha aro Assembly election-rangko apsan ong·atna miksonge ra·baenggipa Bill ong·achim.
Koborko on·ani gitade, ia gital Bill-rangko Lok Sabha-ni Speaker, nambate chanchirimna Parliament-ni Joint Committee-na pakwatatskanaba gnang.