TURA: South Garo Hills a·jani song damsaona rama tariangna chamatgipa tangka paisarangko kragija dake jakkalsreta ine matnangenba, ia songni Nokma, Meghalaya Lokayukta-na badi ka·doangaha.
Meghalaya Lokayukta-na badi ka·doanganio Dana Adugre songni Nokma John Ch Marak-ni parakatani gitade, ia ramara Dapgre-oni Wagegitok bazaar gita Dana Adugre songona dakanggipa rama ong·achim aro ia ramako metalling aro blacktopping on·e tarina gita sorkari, gong kror 6 tangkarangko chamatahachim.
Ia ramako 2019 bilsion final work order on·gipaoni ja 24-ni gisepon matchotna nangani ong·achim ine janapatengon, ia ramako re·ange nion, ia ramao kam ka·ani chinrangkon nikna man·chipkuja ine songni Nokma, Meghalaya Lokayukta-na badi ka·doangaha.
“Ia kamko ka·na seokako man·gipa contractor, maming kamko ka·gija gong kror 4 tangkarangkode okaha aro da·o ia kamko ka·na sanction ka·aoni bilsi 5 ong·pilengahaoba maming kamrangkon matchotkujaenga,” ine Dana Adugre songni Nokma John Ch Marak, Meghalaya Lokayukta-ni Chairman Bhalang Dhar-na badi ka·e sedoatgipa chittio parakataha.
Indake ong·engon, Meghalaya Lokayukta Act 2014-ni Section 20-o pangchake, iani bidingo sandirokna gita ge·etaniko on·china aro kacharina report-ko on·chinaba songni Nokma didiataha.
