SHILLONG: Meghalaya a·doko district council-rangko nangjaha ine mitam manderangni agananiko a·dokni Deputy Chief Minister Prestone Tynsong jegalatenba, Sixth Schedule-ni gamchatgipa ong·aniko ma·sie ra·china didiataha.
“Mitam manderang Sixth Schedule-ko te·srena nangengani gimin social media-rango golpotokenga. Anga uamang baksa jera ra·grike rona nangnikjaenga indiba Sixth Schedule-ni gamchatgipa ong·aniko name ma·sie ra·chinasa anga uamangko didina sikenga,” ine Tynsong aganaha.
Meghalaya a·doko Sixth Schedule dongani giminsa a·dokni 99 percent biaprangko Citizenship (Amendment) Act 2019-oniko wataha ineba Deputy Chief Minister talataniko on·angaha.
Ian a·doko songdongenggipa chonchongipa Tribal jatrangni nangani aro bilrangko maikai Indian Constitution-ni Sixth Schedule chel·chakenga, iako mesokani ong·enga ineba ua aganaha.
A·doko district council-rangko donaniara ‘indin ong·gramaienga’ ine mitam manderangni social media-rango janapahani gimin iana skang, KHADC-ni Chief Executive Membor Pyniaid Sing Syiem-ba an·tangni suk ong·gijaniko parakatahachim.
Sixth Schedule-ko taridapna gita bilsi 73 nangaha ine janapatengon, Sixth Schedule-ko bon·atahaode Tribal manderangko chel·chakna gita gital niamko man·taina badita bilsi nangtaignok ine Syiem sing·doataha.
A·doko Sixth Schedule-ko bilakbatatna gita district council-rang, mitam niamrangko on·dapna rakbee kam ka·engmitingosa mitam manderang district council-rangni kosako kattarangko aganskaenga ineba ua an·tangni suk ong·gijaniko parakataha.