SHILLONG: Ru·uta bilsirangna Meghalaya aro Assam a·dokni simarango ong·enggipa golmalrangko namatna a·dok damgnini gisepo gnigipa agangrikani da·o bon·chipengon, a·dok damgnini gisepo agangrikaniko a·bachengpiltaina Meghalaya sorkari jotton ka·engoba Assam a·dokchipakni kamrang ka·sinenga ine Sukrobar salo a·dokni Cabinet Minister aro West Khasi Hills regional committee-ni chairman Paul Lyngdoh parakataha.
“Agangrikaniko a·bachengpiltaina chinga Assam sorkarina u·iatmanahachim. West Khasi Hills-ni deputy commissioner-ba iani bidingo Kamrup-ni deputy commissioner-na u·iataha aro anga an·tangba Assam-ni chairman Chandra Mohan Patowary-na u·iataha,” ine Lyngdoh aganaha.
A·dok damgnini simarango ong·enggipa golmalrangko namatna agangrikani da·o bilsignimang ong·pile bon·chipengahani gimin bang·a manderangan aro dingtang dingtang dolrangba, a·dok damgnini gisepo agangrikaniko ta·raken matchotatchina nangnikengachim ine nikna man·a.
“Da·o dipet Assam a·dokchipakni aganchakanirang nambrea ong·kujaenga indiba chinga ia agangrikaniko a·bachengpiltaina nangnikenga aro anga bebera·a chinga bakan iako a·bachengpiltaina man·gen,” ine Lyngdoh aganaha.
Meghalaya aro Assam a·dokni simarango batanggimin bilsi 50-na meligrikna man·jaenggipa dam 12 biaprangoni damdok biaprangode tom·tomaniko ra·bapilna gita a·dok damgnini dilgiparang songgigrike soi ka·manahachim aro ia soi ka·grikanio Union Home Minister Amit Shah-ba dongpaahachim.
A·dok damgnini gisepo meligrikna man·jaenggipa dam 12 biaprangoni skanggipa bako namatna soi ka·grikgipa biap damdokara, Gizang, Tarabari, Boklapara, Khanapara-Pilingkata, Ratacherra, aro Hahim ong·achim.
Ia meligrikna man·jaenggipa damdok biaprangoni sq km 18.51-ko Assam aro sq km 36.79-ko Meghalaya ra·na gita songgigrikahachim.
Da·o gnigipa bako namatna gita agangrikenggipa damdok biaprangara, Langpih, Borduar, Deshdoonreah, Block I-II, Pisar-Khanduli, aro Nongwah-Mawtamur (Garbhanga) ong·skaengachim.
