SHILLONG: Re·baenggipa bilsini February 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o National People’s Party (NPP) chegopenba, doltangari Executive Committee (EC)-ko rikna man·gen ine NPP-ni dilgipa aro a·dokni Deputy Chief Minister Sniawbhalang Dhar, an·tangni ka·dongchakenganiko parakataha.
“KHADC aro JHADC-o chinga doltangari EC-ko rikna man·na gita krengenga. Chinga doltangari EC-ko rikna krengenga indiba chinga chu·onga gita seat-rangko chejagenchimode gipin party-rang baksa bakrime kamko ka·na kusi ong·aigen. Chinga maming neng·nikani grian gipin dolrangko rimchaksoaigen,” ine Dhar aganaha.
NPP-ni district council election-na tarisamsoaniko janapatengon, KHADC aro JHADC election damgnion NPP susana tariaha ine Dhar parakataha.
“Chinga KHADC aro JHADC damgnini election-on susana gita tarimanaha,” ine ua aganaha.
District council election-na NPP-ni 80 percent candidate-rangkode tik ka·manaha ine janapatengon, “Krismasna skang ong·jaode January jani skanggipa antio chinga bangki candidate-rangko parakatgnok. Chinga gadang gadang dake kamrangko ka·enga aro kamrangko gnigipa bako matchotatna man·jagenchimode gittamgipa gadangba dongani chol donga,” ine NPP-ni dilgipa aganaha.
NPP-ni candidate-rangko pilak gadangon chanchichengesa aro kamrangko niesa seokenga ineba ua aganaha.
“Chinga a·palo kam ka·enggipa pilak manderangon sing·sanchichengronga aro ian chingni gisepo meligipa ba ripeng ong·giparang ong·na nangja. Block-oni me·chik candidate-ko recommend ka·atenga ong·ode chinga ukoba ra·chakaia indiba skanggipa chinga pangnan chenagipa candidate-kosa nichengronga. Onbatgipa gadangonin chingna kragipa candidate-kosa recommend ka·atenga ine chinga bebera·a,” ine Dhar aganaha.
Congress dolni Executive Committee-o bakrimaoniko ra·pilani gimin janapatskaengon, “Ian politics-sa ong·a, uamang bakrimaniko ra·pilna nangnika ong·ode a·bachengonin ra·pilna nangachim. Indiba chinga NPP-ni gitade apsan kam ka·rimna sikgipa pilak dolrangkon rimchaksoaia aro uamangna do·gako oe donaia,” ine NPP-ni dilgipa aro Deputy Chief Minister parakataha.
KHADC aro JHADC election-o NPP, dingtang dingtang dolrang baksa susagrikna nangenga ine ku·chakatengon, ian NPP-ni bilgrianiko mesokanide ong·ja ine Dhar aganskaaha.
“Garo Hills-ode dolgnisan mongsongbatgipa ong·aia indiba Khasi-Jaintia Hills-ode UDP, NPP, VPP, Congress dolrang dongenba vote-rang priprarongaia. Indiba ian NPP bilgria ine miksongade ong·ja maina da·o dipet chinga bilakgipa ong·enga aro darangba chingko bilgrigipa ine aganna man·jawa. Politics-ode ra·bianirangde dongaia indiba chinga uarangko mikkangpana ka·dongaia,” ine Dhar aganaha.