TURA: West Garo Hills a·jao donggipa Bhaitbari Higher Secondary School-ni bidingo ma·sie ra·na gita ia skulni managing committee (SMC) election-o candidate ong·e susaenggipa Enamul Hoque, skulni PIO-o Right To Information (RTI)-na dorgastoko galataha.
RTI ka·enggipa mandeara, re·anggipa Sonibar salo jinma tom·aniko ong·atanio SMC-ni election-o secretary-ni kamna susana gita adita sak manderangni minge on·gipa mande ong·achim aro uan skulo poraienggipa bi·sa saksani pagipaba ong·achim.
Bhaitbari HS School-ni Principal-na RTI ka·anio ua, Class VI, VII, VIII, IX, X, XI aro XI-o poraienggipa chatro chatri sakprakprako ma·sina aro uamangni ma·a paarangko mesokna gita admission ra·ani register-ko mesokchina aro December 21 tariko ong·atanggipa tom·anio attendance sheet/signature sheet-ni copy-ko mesokan baksana tom·anio chanchirimanirangkoba mesokchina didiangaha.
Mitam manderang, an·tangtangni manderangko SMC-ni membor ong·atna gita election-ko nosto ka·na jotton ka·enga ine matnanganirang ong·katahani gimin Hoque, ia election-o an·tangko SMC-ni secretary-na susachina mingani ja·man ia skulni bidingo RTI ka·doangaha.